ნინოწმინდის ბავშვთა პანსიონი

ჰარცელი: ყველა მხარე თანხმდება, საჭიროა მოქმედება, როცა საქმე ბავშვებზე ზრუნვას ეხება

საგარეო საქმეთა სამინისტრო

ნინოწმინდის ბავშვთა პანსიონთან დაკავშირებით საპატრიარქოში საქართველოში ევროკავშირის ელჩ კარლ ჰარცელთან, გაეროსა და არასამთავრობო ორგანიზაციების წარმომადგენლებთან შეხვედრის გაიმართა. კარლ ჰარცელის თანახმად, ყველა მხარე თანხმდება, რომ ბავშვების ინტერესების უზრუნველყოფისთვის საჭიროა მოქმედება და ბავშვები და მათი უფლებები სრულიად უნდა იყოს დაცული.

"მადლიერი ვარ საპატრიარქოსი დღეს მთავრობის და UNICEF-ის და არასამთავრობო ორგანიზაციების წარმომადგენლებთან ერთად შეხვედრაზე მიწვევისთვის. ყველა მხარე ჩართულია ბავშვებზე ზრუნვის საკითხში. დღევანდელი შეხვედრის ფოკუსი იყო მდგომარეობა ნინოწმინდაში. ყველა მხარე ცალსახად თანხმდება, რომ საჭიროა მოქმედება, როცა საქმე ეხება ბავშვების საუკეთესო ინტერესებზე ზრუნვას – როგორც იმათზე, ვინც უკვე დატოვა ნინოწმინდის პანსიონი, ასევე მათზეც, ვინც ჯერაც პანსიონში რჩება. უნდა დავრწმუნდეთ, რომ [ბავშვებს] აქვთ ფსიქოლოგიური მხარდაჭერა, ფინანსური მხარდაჭერა და ბავშვები და მათი უფლებები სრულიად დაცულია." –თქვა ჰარცელმა.

საქართველოში ევროკავშირის ელჩის თქმით, შეხვედრაზე ასევე განიხილეს უფრო ფართო სტრატეგიული მიზნები და ნინოწმინდის პანსიონის საკითხი დეინსტიტუციონალიზაციის ნაწილია. ჰარცელი აღნიშნავს, რომ შეხვედრა კარგი საწყისი წერტილია იმ მუშაობისა, რომელიც პრობლემასთან დაკავშირებით უნდა დაიწყოს.

5 ივნისს სასამართლომ PHR-ის მოთხოვნა ნინოწმინდის პანსიონიდან ბავშვების გაყვანის შესახებ დააკმაყოფილა. ორგანიზაციის ხელმძღვანელის, ანა აბაშიძის თქმით, ბავშვების დაწესებულებიდან გაყვანა დაუყოვნებლივ უნდა დაიწყოს. გადაწყვეტილება მოსამართლე ივანე ღლონტმა მიიღო.  

PHR-ის წარმომადგენელი, ანა არგანაშვილი განმარტავს, რომ კანონმდებლობით ორგანიზაციისთვის განსაზღვრული სპეციალური მოსარჩელის სტატუსიდან გამომდინარე, განაჩენში არსებობს ტექნიკური ჩანაწერი პანსიონიდან მხოლოდ შშმ ბავშვების გაყვანის შესახებ, მაგრამ, მისივე თქმით, თუ პანსიონში საფრთხე არსებობს, რომელზეც მოსამართლეც საუბრობს, არ შეიძლება იქ რომელიმე ბავშვი დარჩეს. 

საქართველოს საპატრიარქომ ნინოწმინდის ბავშვთა პანსიონთან დაკავშირებით, რომელიც მის დაქვემდებარებაშია, განცხადება გაავრცელა. საპატრიარქო აღნიშნავს, რომ ისინი გაასაჩივრებენ სასამართლოს იმ გადაწყვეტილებას, რომლითაც PHR-ის მოთხოვნა პანსიონიდან ბავშვების დაუყოვნებლივ გამოყვანის შესახებ დაკმაყოფილდა.

ჯანდაცვის სამინისტროს ინფორმაციით, ნინოწმინდის ბავშვთა პანსიონიდან 20 არასრულწლოვანი ალტერნატიულ სერვისებში გადაანაწილეს, მათ შორის, 7 შეზღუდული შესაძლებლობების მქონე ბავშვია. 

გაერთიანებული ერების სააგენტოთა ჯგუფი საქართველოში ნინოწმინდის ბავშვთა პანსიონთან დაკავშირებით განცხადებას ავრცელებს. ორგანიზაცია გმობს ნებისმიერ მცდელობას, რომელიც ხელს უშლის სახალხო დამცველის აპარატისა და ქვეყნის სხვა შესაბამისი უწყებების მხრიდან თავიანთი მოვალეობების შესრულებას. 

ორგანიზაცია ასევე გმობს ბავშვთა მიმართ ნებისმიერი სახის ძალადობას და სასტიკად მოპყრობას და იმედოვნებს, რომ 5 ივნისის სასამართლო გადაწყვეტილება ბავშვთა სახლიდან შეზღუდული შესაძლებლობების მქონე ბენეფიციარების გაყვანის შესახებ იქ მყოფ ყველა ბავშვზე გავრცელდება. 


4 ივნისს სხალთის ეპარქიამ ნინოწმინდის ბავშვთა პანსიონის ბენეფიციარების ამსახველი ვიდეოჩანაწერი სოციალურ ქსელში გაავრცელა. ვიდეოში მონაწილე არასრულწლოვანების იდენტიფიცირება სრულად არის შესაძლებელი. 

ფაქტს გამოეხმაურა სახალხო დამცველიც და სახელმწიფო უწყებებს პანსიონში მყოფი არასრულწლოვნების უფლებადარღვევის განგრძობად ფაქტზე დაუყოვნებლივი რეაგირებისკენ მოუწოდა. ფაქტის შესწავლა დაიწყო სახელმწიფო ინსპექტორის სამსახურმაც. 

2 ივნისს სახალხო დამცველმა, ნინო ლომჯარიამ თქვა, რომ ნინოწმინდის ბავშვთა პანსიონთან დაკავშირებით გამოძიება სავარაუდო გაუპატიურებაზეც არის დაწყებული. 3 ივნისს, საქართველოს საპატრიარქოს საზოგადოებასთან ურთიერთობის სამსახურმა განცხადება გაავრცელა და  შსს-ს შესაბამის სამსახურს მიმართა, ბავშვთა სახლთან დაკავშირებული საქმეები გაესაჯაროებინა. 

მოგვიანებით, შინაგან საქმეთა სამინისტრომ გაავრცელა განცხადება, რომ ნინოწმინდის პანსიონის საქმეში დანაშაულის დასადგენად საკმარისი მტკიცებულებები არ არის. განცხადების თანახმად, 2016 წლიდან დღემდე გამოძიება სისხლის სამართლის 4 საქმეზე მიმდინარეობს, თუმცა, ამ ეტაპზე, საქმეში არ არის საკმარის მტკიცებულებათა ის სტანდარტი, რომლითაც დადგინდება შესაძლო დანაშაულის ჩადენის ფაქტი.

კომენტარები