21 აპრილს ნავალნის მხარდამჭერ აქციაზე რუსეთის 97 ქალაქში 1 788 ადამიანი დააკავეს. ამის შესახებ ინფორმაციას დამოუკიდებელი მონიტორინგის ორგანიზაცია OVD-Info ავრცელებს. ყველაზე მეტი, 800-ზე მეტი მომიტინგე სანქტ-პეტერბურგში დააკავეს.
რუსეთის შინაგან საქმეთა სამინისტროს შეფასებით, მოსკოვში აქციაზე 6 000 ადამიანი გამოვიდა, ნავალნის გუნდის თქმით კი - 60 000. 21 აპრილს მოსკოვში პოლიციამ წითელ მოედანთან ქუჩები გადაკეტა.
აქციის დაწყებამდე დააკავეს ნავალნის ახლო თანამოაზრეები, მათ შორის ოპოზიციონერი ლიუბოვ სობოლი და ნავალნის სპიკერი, კირა იამიში.
ნავალნის გუნდის მიერ შექმნილ ვებგვერდზე ქვეყნის 200 ქალაქიდან აქციებში მონაწილეობის სურვილი გამოთქვა 460 000-მა ადამიანმა. აქციებზე ნაკლები ადამიანი მივიდა.
ნავალნის გუნდის განცხადებით, ისინი სხვადასხვა აქტივობებს კვლავ გააგრძელებენ. "ცხადია, საბოლოო ბრძოლა ჯერ კიდევ წინაა". - წერს ნავალნის თანამოაზრე, ლეონიდ ვოლკოვი.
ამავდროულად, რუსი პროკურორები ითხოვენ ნავალნის ორგანიზაციის ექსტრემისტულად გამოცხადებას.
რამდენიმე დღის წინ ალექსეი ნავალნი პოკროვის № 2 კოლონიიდან ვლადიმირს № 3 კოლონიის საავადმყოფოში გადაიყვანეს. ნავალნის ადვოკატის, ვადიმ კობზევის თანახმად, პოლიტიკოსი კოლონიის ტუბერკულოზის საავადმყოფოს ერთკაციან განყოფილებაში იმყოფება და მისი ერთადერთი მკურნალობა გლუკოზის წვეთოვანია.
მას შემდეგ, რაც ალექსეი ნავალნიმ შიმშილობა დაიწყო, მისი ჯანმრთელობის მდგომარეობა მნიშვნელოვნად გაუარესდა, ექიმების თქმით, პოლიტიკოსს სისხლში კალიუმის საგანგაშოდ მაღალი დონე აქვს, რამაც შეიძლება გულის პრობლემები და გულის შეტევაც კი გამოიწვიოს.
მარტში პორკოვის კოლონიაში გადაყვანის შემდეგ ალექსეი ნავალნის ჯანმრთელობის მდგომარეობა გაუარესდა, მას ზურგის ძლიერი ტკივილი აწუხებდა და კიდურები უბუჟდებოდა, ნავალნის ხერხემლის თიაქარი აქვს. 31 მარტს პოლიტიკოსმა შიმშილობა დაიწყო. მისი მოთხოვნაა, დაუშვან მასთან დამოუკიდებელი ექიმი, რათა მიიღოს სათანადო მკურნალობა.
ცნობილი ადამიანები, მათ შორის მსახიობები, მწერლები, რეჟისორები, პუტინს დაჟინებით მოუწოდებენ ნავალნიმ სამედიცინო დახმარება მიიღოს.
ადამიანის უფლებათა დაცვის საერთაშორისო ჯგუფის, Amnesty International-ის ცნობით, რუსეთის მთავრობა, შესაძლოა, ნელა კლავს ნავალნის. ორგანიზაცია ამბობს, რომ რუსი ოპოზიციონერი ისეთ პირობებშია, რაც წამებას უდრის და ამან, შესაძლოა, მისი ნელა სიკვდილიც გამოიწვიოს.
ალექსეი ნავალნი რუსეთში გერმანიიდან 17 იანვარს დაბრუნდა, ის ქვეყანაში ჩასვლისთანავე დააკავეს. გერმანიაში ის "ნოვიჩოკის" ჯგუფის ნერვული აგენტით მოწამვლის შემდეგ მკურნალობდა.
რუსეთის სასჯელაღსრულების ფედერალური სამსახური ნავალნის "ივ როშეს" საქმეზე გამოსაცდელი ვადის დარღვევაში ედავებოდა და პირობითი სასჯელის რეალურით შეცვლას ითხოვდა.
2 თებერვალს ნავალნის სასამართლომ 2 წლითა და 8 თვით პატიმრობა მიუსაჯა "ივ როშეს" საქმეზე. აღსანიშნავია, რომ ნავალნის თავდაპირველად 3 წლითა და 6 თვით მიუსაჯეს პატიმრობა, თუმცა მის სასჯელს აკლდება შინაპატიმრობაში გატარებული 10 თვე.
2014 წელს ალექსეი ნავალნი და მისი ძმა ოლეგი დამნაშავედ ცნეს თაღლითობაში. გამოძიების ვერსიით, მათ დაარწმუნეს კომპანია "ივ როშე", გაეფორმებინათ არახელსაყრელი კონტრაქტი. რუსეთის სასამართლოს ალექსეი ნავალნის 3.5 წლით პირობითი სასჯელი და 5 წლით გამოსაცდელი ვადა, ხოლო მის ძმას 3.5-წლიანი პატიმრობა მიუსაჯა. მოგვიანებით ალექსეი ნავალნის გამოსაცდელი ვადა ერთი წლით გახანგრძლივდა და, შესაბამისად, 2020 წლის 30 დეკემბერს ამოიწურა.
2017 წელს ადამიანის უფლებათა ევროპულმა სასამართლომ დაადგინა, რომ ალექსეი ნავალნის და მის ძმას არ ჰქონდათ სამართლიანი სასამართლოს უფლება და განჩინება დაგმო, როგორც "უკანონო და თვითნებური" და "პოლიტიკურად მოტივირებული". რუსეთის ფედერაციამ ნავალნის კომპენსაცია გადაუხადა, თუმცა განაჩენი არ გაუუქმებია.
ალექსეი ნავალნის დაპატიმრებას რუსეთში ხალხმრავალი საპროტესტო აქციები მოჰყვა.
ალექსეი ნავალნის მოწამვლისა და დაპატიმრებისთვის ევროკავშირმა და აშშ-მ კოორდინირებულად რუს მაღალჩინოსნებს სანქციები მარტის დასაწყისში დაუწესეს. ბაიდენის ადმინისტრაციის ოფიციალურმა პირებმა განაცხადეს, რომ აშშ-ს სახაზინო დეპარტამენტმა სანქციები დაუწესა რუსეთის მთავრობის მაღალი რანგის შვიდ წარმომადგენელს.
25 მარტს კანადის საგარეო საქმეთა სამინისტრომ 9 რუს მაღალჩინოსანსა და ძალოვანი სტრუქტურების წარმომადგენელს "რუსეთში ადამიანის უფლებების უხეში და სისტემატური დარღვევისთვის" სანქციები დაუწესა.
