საერთაშორისო რესპუბლიკური ინსტიტუტის საზოგადოებრივი აზრის კვლევის თანახმად, ოპოზიციის მიერ პარლამენტში შესვლის ბოიკოტს სრულად ან ნაწილობრივ მხარს მოსახლეობის 60% არ უჭერს. ბოიკოტს მხარს სრულად ან ნაწილობრივ 26% უჭერს.
კითხვაზე პასუხები შემდეგნაირად ნაწილდება:
- სრულად დიახ – 15%
- ნაწილობრივ დიახ – 11%
- ნაწილობრივ არა – 42%
- სრულად არა – 18%
- არ ვიცი/უარი პასუხზე – 14%
კვლევის თანახმად, ოპოზიციის მოთხოვნას ვადამდელი არჩევნების ჩატარების შესახებ მხარს მოსახლეობის 45% სრულად/ნაწილობრივ უჭერს, 45% კი ამ მოთხოვნას სრულად ან ნაწილობრივ არ უჭერს მხარს.
კვლევის მიხედვით, 2020 წლის არჩევნებს სრულად ან ნაწილობრივ არათავისუფლად, არასამართლიანად და გაუმჭვირვალედ მოსახლეობის 35% მიიჩნევს.
კვლევა ჩატარდა 2021 წლის 2-26 თებერვლის პერიოდში. შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს. მონაცემები შეწონილ იქნა ასაკის, გენდერის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5%-ს, გამოპასუხების მაჩვენებელი – 75%.
2020 წლის საპარლამენტო არჩევნების შედეგებს ოპოზიციური პარტიების დიდი ნაწილი არ აღიარებს და ბოიკოტის ნიშნად, მე-10 მოწვევის პარლამეტში არ შედის. სხვა საკითხებთან ერთად, მათი ძირითადი მოთხოვნა ვადამდელი არჩევნებია, საარჩევნო კოდექსისა და საარჩევნო კომისიის რეფორმის ფარგლებში.
