საქართველოს სტატისტიკის ეროვნული სამსახურის მიერ დღეს გამოქვეყნებული ანგარიშის თანახმად, 2020 წლის იანვარში წლიური ინფლაციის დონემ 2.8% შეადგინა, დეკემბერთან შედარებით კი ფასების საერთო დონე 1.1%-ით გაიზარდა.
საქსტატის თანახმად, წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:
- სურსათი და უალკოჰოლო სასმელები - ჯგუფში ფასები გაიზარდა 6.4%-ით.
- ჯანმრთელობის დაცვა - ჯგუფში ფასები მომატებულია 9.7%-ით.
- ავეჯი, საოჯახო ნივთები, სახლის მოვლა - ჯგუფში დაფიქსირდა ფასების 10.8%-იანი მატება.
- ალკოჰოლური სასმელები, თამბაქო - ჯგუფში ფასები გაიზარდა 6.9%-ით.
- საცხოვრებელი, წყალი, ელ.ენერგია, აირი - ჯგუფში დაფიქსირდა ფასების 20.5%-იანი კლება.
მოცემული ჯგუფებიდან ბოლო ერთი წლის განმავლობაში ფასები ყველაზე მეტად შემდეგ ქვეჯგუფებში გაიზარდა:
- ზეთი და ცხიმი - 27%;
- ყავა, ჩაი, კაკაო - 12.6%;
- თევზეული - 10.4%;
- რძე, ყველი და კვერცხი - 9.1%;
- პური და პურპროდუქტები - 7.5%;
- შაქარი ჯემი და სხვა ტკბილეული - 8.95;
- თამბაქოს ნაწარმი - 9.1%;
- ალკოჰოლური სასმელები - 5.2%;
ფასები გაიზარდა სამედიცინო პროდუქციაზე (14%-ით), საოჯახო საფეიქრე ნაწარმზე (26.7%-ით) და ავეჯზეც (9.7%-ით).
ფასების კლება მხოლოდ ხილისა და ყურძნის ( 3.2%-ით), წყალმომარაგებისა და საცხოვრებელთან დაკავშირებული სხვა მომსახურებების (33.8%-ით), ელექტროენერგიის, აირისა და სათბობის სხვა სახეების ქვეჯგუფებშია (28.9%-ით).
ყოველთვიური ინფლაციის მაჩვენებლის ფორმირებაზე კი ძირითადი გავლენა იქონია ფასების ცვლილებამ სურსათისა და უალკოჰოლო სასმელების ჯგუფში 2%-ით, ტრანსპორტის ჯგუფში 1.4%-ით, ხოლო საცხოვრებლის, წყლის, ელ.ენერგიისა და აირების ჯგუფში 1.9%-ით.
იანვარში წინა თვესთან შედარებით ფასებმა ყველაზე მეტად შემდეგ ქვეჯგუფებში მოიმატა: ბოსტნეული და ბაღჩეული (6.1%), ხილი და ყურძენი (4.4%), ზეთი და ცხიმი (4.3%), რძე, ყველი და კვერცხი (4%).