ცაგერის სამ სოფელში, ლაჯანაში, სპათაგორში და ორდელში გადაადგილება შეიზღუდა. ამის შესახებ ინფორმაცია ტაბულას ცაგერის მერიაში დაუდასტურეს.
მათი ცნობით, ადგილზე მიმდინარეობს მოსახლეობის თერმოსკრინინგი – სოფლებში შემსვლელ ყველა პირს უტარდება თერმოსკრინინგი, სოფლებიდან გასვლა კი შეზღუდულია მანამდე, სანამ ტესტის შედეგები ცნობილი არ გახდება.
"სოფლებში მუშაობენ ეპიდემიოლოგები და მოწმდება აბსოლუტურად ყველა პიროვნება". – უთხრეს ტაბულას ცაგერის მერიაში.
მათივე თქმით, მუნიციპალიტეტში, დღეის მონაცემებით, კორონავირუსით ინფიცრების 12 შემთხვევა დადასტურდა, მათ შორის 7 - ბოლო 24 საათში.
დღეს საქართველოში კორონავირუსით ინფიცირების 57 ახალი შემთხვევა დადასტურდა, გამოჯანმრთელდა კიდევ 9 ადამიანი. სულ ქვეყანაში გამოვლენილია ახალი კორონავირუსის 1 830 შემთხვევა, საიდანაც გამოჯანმრთელდა 1 334 პაციენტი და გარდაიცვალა – 19.
