პეკინი შეურთდა ჩინეთის ათობით სხვა ქალაქს, რომლებმაც მოხმარების სტიმულირებისთვის მოსახლეობას სპეციალური ვაუჩერები დაურიგეს. ინფორამაციას ამის შესახებ Bloomberg ავრცელებს.
პეკინის ხელისუფლება მოსახლეობას ჯამურად 12.2 იოანს [1.7 მილიარდი დოლარის] ღირებულების ვაუჩერებს დაურიგებს, რომელთა განაღდებაც სხვადასხვა სახის საყიდლებისთვის და კვების ობიექტებში იქნება შესაძლებელი.
ვაუჩერების გაცემა 6 ივნისს, ადგილობრივი დროით დილით, 10:00 საათზე დაიწყო. მოსახლეობას სამთავრობო ვაუჩერების გამოყენება ტურისტული სფეროს მომსახურების და ასევე, ონლაინ ვაჭრობისთვისაც შეეძლებათ.
ვაუჩერები 4 ეტაპად გაიცემა და თითოეულის გამოყენება 14 დღის განმავლობაში იქნება შესაძლებელი. მიმდინარე წლის პირველი ოთხი თვის განმავლობაში პეკინში რიტეილერების გაყიდვები, დაახლოებით 20%-ით შემცირდა. ქვეყნის მასშტაბით იგივე მაჩვენებელმა 16% შეადგინა.
მანამდე იმავე ზომებს ჩინეთის, დაახლოებით, 50-მა ქალაქმა მიმართა, ჯამურად გაცემულია 846 მილიონი დოლარის ვაუჩერები.
17 აპრილს ჩინეთის სტატისტიკის სამსახურმა პირველი კვარტლის ეკონომიკური მაჩვენებლები გამოაქვეყნა. მიმდინარე წლის პირველ კვარტალში ჩინეთის მშპ 6.8%-ით შემცირდა.
კლებამ მნიშვნელოვნად გადააჭარბა ანალიტიკოსების პროგნოზს. ჩინეთის ეკონომიკა 1976 წლიდან მოყოლებული მუდმივად იზრდებოდა, ეს 44 წლის განმავლობაში კლების პირველი შემთხვევაა.
შედეგად, 22 მაისს ჩინეთის კომუნისტურმა პარტიამ უარი თქვა მშპ-ის ზრდის სამიზნე მაჩვენებლის განსაზღვრაზე, რასაც ქვეყანა 1994 წლიდან მოყოლებული უწყვეტად აკეთებდა.
"ჩვენ უარი ვთქვით სამიზნე მაჩვენებლის განსაზღვრაზე, რადგან გლობალური პანდემიით გამოწვეული არასტაბილურობა ეკონომიკასა და ვაჭრობაში კვლავ ძალიან მაღალია", — განაცხადა ჩინეთის ნომინალურმა პრემიერმა, ლი კეციანმა.
