ამერიკის შეერთებულმა შტატებმა კორონავირუსთან ბრძოლის ფარგლებში მიმოსვლა დიდ ბრიტანეთთან და ირლანდიასთანაც შეაჩერა. ინფორმაცია აშშ-ის ვიცე-პრეზიდენტმა, მაიკლ პენსმა დაადასტურა.
გადაწყვეტილება ძალაში ორშაბათს, 16 მარტს, ღამის 00:00 საათიდან შევა.
აშშ-ის მოქალაქეებს ქვეყანაში დაბრუნება გადაწყვეტილების ძალაში შესვლის შემდეგაც შეეძლებათ. ქვეყანაში ჩასვლის შემდეგ მათ კარანტინი უნდა გაიარონ.
გუშინ, 13 მარტს, დონალდ ტრამპმა აშშ-ში საგანგებო მდგომარეობა გამოაცხადა.
მანამდე, აშშ-მა ევროპის 26 ქვეყანასთან მიმოსვლა 30 დღით შეაჩერა. შეზღუდვა ეხებათ იმ პირებს, რომლებიც აშშ-ში გამგზავრებამდე ბოლო 14 დღის განმავლობაში შენგენის ზონაში იმყოფებოდნენ. ამ განმარტების მიხედვით შეზღუდვა არ ვრცელდება ევროკავშირის იმ წევრ ქვეყნებზე, რომლებიც შენგენის ზონაში არ შედიან.
აშშ-ში კორონავირუსით 2 499 ადამიანი დაინფიცირდა. გამოჯანმრთელდა 49 ადამიანი, გარდაიცვალა 55.