7 თებერვალს რუსეთის პრეზიდენტმა ვლადიმერ პუტინმა ბელარუსის პრეზიდენტს ალექსანდრ ლუკაშენკოს სოჭში უმასპინძლა, მაშინ, როდესაც ბელარუსსა და რუსეთს შორის ურთიერთობები დაძაბულია, მეტწილად ბელარუსისა და რუსეთის ინტეგრაციის საკითხის და რუსეთისგან ნავთობის წარმოების პროდუქტის ფასებთან დაკავშირებული უთანხმოებების გამო.
ბელარუსისა და რუსეთის ლიდერების შეხვედრის შემდეგ, პუტინის შტაბის უფროსის მოადგილემ დმიტრი კოზაკმა განაცხადა, რომ მხარეებმა ბუნებრივი აირის მიწოდებაზე შეთანხმებას მიაღწიეს და მიმდინარე წელს რუსეთი ბელარუსს 2019 წლის მსგავსად 1000 კუბურ მეტრ ბუნებრივ აირს 127 აშშ დოლარად მიყიდდა. რაც შეეხება ნავთობს, კოზაკის თქმით, რუსეთს ბელარუსისთვის ნავთობის მიწოდება საბაზრო ფასში შეუძლია. მხარეები ნავთობის ფასის შესახებ მოლაპარაკებებს კვალავ გააგრძელებენ.
მისივე თქმით, ლუკაშენკო და პუტინი ინტეგრაციის შესახებ მოლაპარაკებების გაგრძელებაზეც შეთანხმდნენ.
ბელარუსისა და რუსეთის ლიდერებმა ერთად ყინულის ჰოკეიც ითამაშეს.
ზუსტად ერთი კვირის წინ ლუკაშენკო აშშ-ის სახელმწიფო მდივანს მაიკ პომპეოს შეხვდა, რომელმაც უთხრა, რომ აშშ მზადაა ბელარუსის ნავთობის საჭიროების 100%-ით უზრუნველჰყოს.
შეგახსენებთ, რომ ბელარუსი და რუსეთი 2020 წლისთვის ნავთობის მომარაგებაზე ამ დრომდე არ შეთანხმებულან. რუსეთმა ბელარუსს ნავთობის მიწოდება 1 იანვრის შეუჩერა, რაც 4 იანვარს ნაწილობრივ აღდგა.
ბელარუსის მხარე ამბობს, რომ მას შემდეგ, რაც რუსეთმა ნავთობის სუბსიდიები შეაჩერა და ფასები აწია, ბელარუსმა 2019 წლიდან უკვე 300 მილიონი აშშ დოლარი დაკარგა.
2019 წლის დეკემბერში ინტეგრაციის საკითხზე მოლაპარაკებების გამართვას ბელარუსში წლების განმავლობაში ერთერთი ყველაზე დიდი პროტესტი მოყვა. "ეს არ არის ინტეგრაცია, ეს ოკუპაციაა," - ვკითხულობთ აქციაზე ერთერთ ბანერზე.
დეკემბრის ბოლოს რუსეთის პრეზიდენტმა პუტინმა ხაზგასმით აღნიშნა, რომ ის ვერ ხედავდა ბელარუსისთვის გაზის შეღავათიან ფასად მიწოდების არსს მანამ, სანამ ინტეგრაციის პროექტი უფრო წინ არ წავიდოდა.
აშშ და ევროკავშირი ბელარუსის ლიდერს, რომელიც ქვეყანას უკვე 26-ე წელია მართავს, ადამიანის უფლებების დარღვევისთვის ხშირად აკრიტიკებენ.
დასავლეთსა და ბელარუსს შორის ურთიერთობები მას შემდეგ გაუმჯობესდა, რაც 2014 წელს ბელარუსმა რუსეთის მიერ ყირიმის ანექსიას მხარი არ დაუჭირა. 2016 წელს დასავლეთმა ბელარუსს სანქციების ნაწილი მოუხსნა, რადგან ლუკაშენკომ პოლიტიკური პატიმრები გაათავისუფლა.
