ქართული მარშის ლიდერი სანდრო ბრეგაძე ტვ პირველის ეთერში ამბობს, რომ მას ქართულ-შვედური ფილმი "და ჩვენ ვიცეკვეთ" ნანახი აქვს.
სანდრო ბრეგაძე: მე ამ ფილმს არ განვიხილავ როგორც ფილმს, ეს არ არის ფილმი.
ინგა გრიგოლია: ნანახი გაქვს ეს ფილმი?
სანდრო ბრეგაძე: კი, ნანახი მაქვს. მე ალბათ იმ იშვიათ გამონაკლისში შევდივარ, რომელთაც ეს ფილმი ნანახი აქვთ. გადმომიგზავნეს, სხვათა შორის, შვედეთიდან და კომპიუტერში ვნახე. მთლიანად ვერ გავუძელი ყურებას, იმდენად დაბალი მხატვრული ღირებულების ფილმია.
გუშინ, 4 ოქტომბერს, სანდრო ბრეგაძემ თქვა, რომ ფილმის "და ჩვენ ვიცეკვეთ" საქართველოს კინოთეატრებში ჩვენებას არ დაუშვებს. მანვე, ON.GE-ს უთხრა, რომ "ვინც ამ ფილმზე წავა, ან გეია, ან ლატენტური გეი".
ბრეგაძის ცნობით, 8 ნოემბერს, როდესაც ფილმის ჩვენებაა დაგეგმილი, მარშის წევრები კინოთეატრების შესასვლელების ბლოკირებას "მშვიდობიანი ფორმით მოახდენენ"
შინაგან საქმეთა სამინისტროში ტაბულას უთხრეს, რომ პოლიცია კანონის შესაბამისად იმოქმედებს.
ფილმის ჩვენება თბილისისა და ბათუმის კინოთეატრებში 8-დან 10 ნოემბრის ჩათვლით გაიმართება.
დღეს, 5 ოქტომბერს, პროპუტინური ძალების ლიდერმა ლევან ვასაძემაც გაავცელა ვიდეო მიმართვა და ფილმის And Then We Danced-ის ჩვენების ჩაშლა დაანონსა.
ლევან აკინის ფილმი And Then We Danced ოსკარის 92-ე ცერემონიაზე შვედეთის სახელით უცხოენოვანი ფილმების კატეგორიაში გაიგზავნება.
ფილმის პრემიერა წელს კანის ფესტივალზე გაიმართა. ფილმი კინოფესტივალის Director’s Fortnight-ში, ანუ 25 ფილმში მოხვდა და კანის კინოფესტივალის 10 საუკეთესო ფილმს შორის მეშვიდე ადგილზე გავიდა.
ლევან აკინის დრამამ ისეთ ფილმებს და რეჟისორებს გაუსწრო, როგორიცაა კვენტინ ტარანტინო, დექსტერ ფლეტჩერი და სხვები.
