აშშ-ის პრეზიდენტმა კიდევ ერთხელ დაიცვა გადაწყვეტილება სირიიდან ამერიკული ჯარის გამოყვანის თაობაზე და თურქეთს სანქციებით მეორეჯერ დაემუქრა.
"თურქები ქურთებზე თავდასხმას დიდხანს გეგმავდნენ. იბრძოდნენ უსასრულოდ. თავდასხმის ადგილის მახლობლად ჩვენ არ გვყავს ჯარისკაცები ან სამხედრო ძალა. მე ვცდილობ უსასრულო ომების დასრულებას. მივმართავ ორივე მხარეს. ზოგს სურს, რომ ადგილზე ჩვენ ათიათასობით ჯარისკაცი გავაგზავნოთ და ახალი ომი დავიწყოთ. თურქეთი NATO-ს წევრია. სხვები ამბობენ, შორს დადექი, დაე, ქურთებმა იბრძოლონ თავიანთ ბრძოლებში (ჩვენი ფინანსური დახმარებით). მე ვამბობ, რომ თუ თურქეთი წესებით არ იმოქმედებს, ფინანსურად და სანქციებით ძალიან ძლიერად დავარტყათ! ახლოდან ვაკვირდები [მოვლენებს]".
ამავე დღეს აშშ-ის პრეზიდენტმა დონალდ ტრამპმა ჟურნალისტებთან საუბარში თქვა, რომ ქურთები აშშ-ს მეორე მსოფლიო ომში არ დახმარებიან - "[ქურთები] მეორე მსოფლიო ომში არ დაგვხმარებიან, მაგალითად, არ დაგვხმარებიან ნორმანდიაში - ისინი ბრძოლების სახელებს ახსენებენ, მაგრამ იქ არ ყოფილან. ჩვენ უზარმაზარი თანხები დავხარჯეთ მათ დასახმარებლად. ისინი საკუთარი მიწისთვის იბრძვიან. როდესაც ამბობთ, რომ ისინი აშშ-სთვის იბრძვიან, დიახ, მაგრამ ისინი საკუთარი მიწისთვის იბრძვიან".
5 წლის განმავლობაში ე.წ. ისლამური სახელმწიფოს წინააღმდეგ აშშ-სთან ერთად ბრძოლაში ქურთულმა შენაერთებმა 11,000 მებრძოლამდე დაკარგეს.
შეგახსენებთ, რომ თურქეთის პრეზიდენტმა, რეჯეფ თაიფ ერდოღანმა საკუთარ ტვიტერზე დაწერა, რომ ჩრდილოეთ სირიაში სამხედრო ოპერაცია დაიწყო. მან ხაზი გაუსვა, რომ ოპერაცია მშვიდობის გაზაფხულის სამიზნეს ქურთისტანის მუშათა პარტიის/ქურთისტანის სახალხო დაცვის კავშირის და ე.წ. ისლამური სახელმწიფო წარმოადგენენ.
პირველი საჰაერო დარტყმები ქალაქ რას ალ-აინზე განხორციელდა.
8 ოქტომბერს თურქეთის უსაფრთხოების ძალების წარმომადგენელმა მედიასთან საუბარში თქვა, რომ ტრამპის გადაწყვეტილების შემდეგ თურქეთმა უკვე განახორციელა თავდასხმა სირია-ერაყის საზღვარზე, იმისთვის, რომ ერაყიდან ქურთული ძალების გაძლიერებისთვის ხელი შეეშალა. დარტყმების მიზანს ერაყისა და სირიის დამაკავშირებელი იმ გზის დაბლოკვა წარმოადგენდა, რომელსაც ქურთი მებრძოლები იყენებენ.
აშშ-ის პრეზიდენტმა დონალდ ტრამპმა მიმდინარე კვირას მიიღო გადაწყვეტილება სირიის ჩრდილო-აღმოსავლეთით, თურქეთის მოსაზღვრე რეგიონში სირიის დემოკრატიულ ძალებთან ერთად განლაგებული ამერიკული ჯარი გამოეყვანა.
მან ამ გადაწყვეტილების დაცვისას ისიც თქვა, რომ ქურთები თურქეთს ათწლეულებია ებრძვიან და დროა ამერიკა დაუსრულებელი ომებიან გამოვიდეს.
აშშ-ის პრეზიდენტი ირწმუნება, რომ საკუთარი “დიდი და სწორუპოვარი სიბრძნით” იხელმძღვანელებს და თურქეთს წითელი ხაზების გადაკვეთის შემთხვევაში ეკონომიკურად გაანადგურებს.
თურქეთი ქურთულ სახალხო დაცვის შენაერთებს, რომლებიც სირიის დემოკრატიული ძალების დიდ ნაწილს შეადგენენ, ქურთისტანის მუშათა პარტიის ნაწილად მიიჩნევს და შესაბამისად ტერორისტულ ორგანიზაციად აღიარებს.
მიუხედავად იმისა, რომ თურქეთმა ბოლო წლებში არაერთი სამხედრო ოპერაცია განახორციელა სირიის ტერიტორიაზე, ამ დრომდე რეგიონში, სადაც ამერიკული ძალები სირიის დემოკრატიულ ძალებთან და მასში შემავალ ქურთულ დანაყოფებთან ერთად იყო განთავსებული სამხედრო მოქმედებებისაგან თავს იკავებდა.
ამჯერად თურქეთი სირიის ჩრდილო-აღმოსავლეთით უსაფრთხო ზონის შექმნას და ტერორისტული ელემენტებისაგან მის გაწმენდას გეგმავს, რათა სირიელი მიგრანტების დაბრუნება გახდეს შესაძლებელი.
ამჟამად თურქეთს 3.6 მილიონი სირიელი აფარებს თავს. ერდოღანს სურს, რომ მათგან 2 მილიონი უსაფრთხო ზონებში დააბრუნოს.
სამხედრო ოპერაციის არსებული გეგმა შეზღუდულ მოქმედებებს მოიცავს საზღვრის მიმდებარედ 100 კილომეტრში, სადაც ძირითადად არაბებით დასახლებული ქალაქები მდებარეობს, მათ შორის თალ აბიადი და რას ალ-აინი. ამერიკული ძალები ამ ტერიტორიიდან უკვე გავიდნენ.
აშშ-ის ჯარების გამოყვანის თაობაზე ტრამპის გადაწყვეტილებაზე, თურქეთის სამხედრო ოპერაციასა და სირიაში არსებულ სიტუაციაზე ვრცლად შეგიძლიათ წაიკითხოთ აქ.
