სტატისტიკის ეროვნული სამსახურის წინასწარი მონაცემებით, 2019 წლის მეორე კვარტალში საქართველოს რეალური მთლიანი შიდა პროდუქტი (მშპ) 4.5%-ით გაიზარდა წინა წლის ანალოგიურ პერიოდთან შედარებით.
ზრდა ყველაზე დიდი ტრანსპორტის (17.9%), უძრავი ქონებით ოპერაციებისა (16.9%) და სასტუმროებისა და რესტორნების (14.1%) დარგებში იყო.
განათლების, სამთომოპოვებითი მრეწველობისა და მშენებლობის დარგები კი შემცირდა, შესაბამისად, 7.9%, 7.7% და 4.6%-ით.
მთლიანი შიდა პროდუქტის ყველაზე მსხვილი დარგი ვაჭრობა იყო, რომელიც მშპ-ს 16.8%-ს შეადგენდა მეორე კვარტალში. ამას მოსდევს მრეწველობა 16.4%-ით და ტრანსპორტი და კავშირგაბმულობა 10.9%-ით.
პირველ კვარტალში მშპ-ს ზრდა 4.9%-ს შეადგენდა.
აღნიშნული მონაცემები წინასწარია, საქსტატი დაზუსტებულ მონაცემებს 2019 წლის 15 ნოემბერს გამოაქვეყნებს.
საქართველოს ეროვნულმა ბანკმა 24 ივლისს ეკონომიკური ზრდის პროგნოზი 0.5%-ით შეამცირა 4.5%-მდე. მაისში გამოქვეყნებულ მონეტარული პოლიტიკის ანგარიშში ეროვნული ბანკი ვარაუდობდა, რომ წელს ზრდა 5%-იანი იქნებოდა. როგორ ეროვნული ბანკის განცხადებაშია ნათქვამი, გადაწყვეტილების მიზეზი ტურისტული შემოსავლების კლების მოლოდინი გახდა.
