ათასობით ჰონგ-კონგელი ადვოკატი აქციებში მონაწილე მომიტინგეებზე პოლიტიკური დევნის დასრულებას ითხოვს.
ადვოკატები პოლიტიკური დევნის დასრულებას, იუსტიციის სამინისტროს დამოუკიდებლობის შენარჩუნებას და ჩინეთში ექსტრადიციის კანონპროექტის გაწვევის მოთხოვნით მიმდინარე აქციებზე მომხდარი სხვადასხვა შემთხვევის გამოსაძიებლად დამოუკიდებელი კომისიის შექმნას ითხოვენ.
ადვოკატებმა სააპელაციო სასამართლოდან იუსტიციის სამინისტრომდე მსვლელობა მოაწყვეს. აქციას 3 000 ადვოკატი შეუერთდა.
ადვოკატებმა უკვე მეორეჯერ გამართეს ამგვარი მსვლელობა. პირველად მათ ჩინეთში ექსტრადიციის კანონპროექტის გაწვევა 6 ივნისს მოითხოვეს.
უკვე ორი თვეა, რაც ჰონგ-კონგის ქუჩებში მილიონობით ადამიანი იმ კანონპროექტის წინააღმდეგ გამოდის, რომლითაც დამნაშავეების კონტინენტურ ჩინეთში გაგზავნა იქნება შესაძლებელი. კრიტიკოსები მიიჩნევენ, რომ აღნიშნული კანონი საფრთხეს შეუქმნის ქალაქის იურიდიულ დამოუკიდებლობას.
მიუხედავად იმისა, რომ ჰონგ-კონგის ლიდერმა კერი ლამმა "განუსაზღვრელი ვადით" შეაჩერა ჩინეთში ექსტრადიციის კანონპროექტი და მომიტინგეებს ბოდიშიც მოუხადა, საპროტესტო აქციები კვლავ გრძელდება - ისინი კერი ლამის გადადგომას, კანონის სრულ გაწვევასა და მეტ დემოკრატიას ითხოვენ.
მომიტინგეები შიშობენ, რომ ლამის მმართველობის სათავეში ყოფნით ჰონგ-კონგში ჩინეთის გავლენა გაიზრდება.
ჰონგ-კონგის საკანონმდებლო სისტემას პეკინის მომხრე უმრავლესობა აკონტროლებს. პეკინის იურიდიული სისტემა ადამიანის უფლებების დარღვევით მოქმედებს, თუმცა ჰონგ-კონგის მთავრობა მოსახლეობას ეუბნება, რომ ექსტრადიციის კანონში საშიში არაფერია.
საკამათო კანონი არა მხოლოდ ჰონგ-კონგის იურიდიულ დამოუკიდებლობას, არამედ მსოფლიოს ერთერთ უდიდეს ფინანსურ ცენტრს უქმნის საფრთხეს. არაერთმა ბიზნესმენმა თქვა, რომ კანონი საფრთხეს შეუქმნის იმ თავისუფლებებს, რითაც აქ მყოფი ბიზნესმენები სარგებლობენ, გააქრობს ინვესტორთა ნდობას და ქალაქის კონკურენტულ უპირატესობას.