ანტისაოკუპაციო აქციის ორგანიზატორების ნაწილი პარლამენტის წინ სცენას იცავს [ფოტოები]

ანტისაოკუპაციო აქციის ორგანიზატორების ნაწილი პარლამენტის წინ მოწყობილ სცენას იცავს. მათ პრორუსული აქციისაგან პოლიციის კორდონი ჰყოფთ. ისინი ამბობენ, რომ პოლიციმ მათ სცენაზე აპარატურის შეტანის უფლება არ მისცა, თუმცა ამის უფლება მისცეს პრორუსული აქციის ორგანიზატორებს.

ანტისაოკუპაციო აქცია "სირცხვილია" პარლამენტის წინ მეცხრამეტე დღეა იმართება. მომიტინგეები შინაგან საქმეთა მინისტრის, გიორგი გახარიას გადადგომას ითხოვენ.

დილიდან, პარლამენტის მიმდებარე ტერიტორია პროპუტინურმა ექსტრემისტულმა დაჯგუფებებმა - მართლმადიდებელ მშობელთა კავშირმა, ქართულმა მარშმა და ლევან ვასაძის მომხრეებმა დაიკავეს. დავით ისაკაძემ ტერიტორიის ბანერებისგან გასუფთავებას მოითხოვა და განაცხადა, რომ სამოქალაქო აქტივისტებს ანტისაოკუპაციო აქციებს აღარ ჩაატარებინებს. ისაკაძემ ასევე გადაწყვიტა, გახარიას გადადგომის მოთხოვნით მოშიმშილეებს მეთვალყურეები დაუყენოს.

მიუხედავად ამისა აქცია "სირცხვილია 19.0" ტარდება. ისინი პუშკინის სკვერთან შეიკრიბნენ და ამის შემდეგ წავიდნენ რუსთაველის გამზირისკენ. პოლიციამ მათ უთხრა, რომ პარლამენტთან აქციას ვერ ჩაატარებდნენ, მათივე "უსაფრთხოებიდან გამომდინარე".

პრორუსულ და ანტისაოკუპაციო აქციებს ამ დროისთვის პოლიციის და ავტობუსების კორდონი ჰყოფს.