იუსტიციის სამინისტრომ უვიზო მიმოსვლის დღეების გამომთვლელი მობილური აპლიკაცია „Schengen/EU App“ შექმნა. აპლიკაციის მოძებნა და ჩამოტვირთვა უკვე შესაძლებელია.
იუსტიციის სამინისტროს ცნობით, აპლიკაცია მოქალაქეებს აძლევს საშუალებას:
• შეინახონ შენგენის ზონაში მოგზაურობის ისტორია (მათ შორის, ქვეყნების მითითებით);
• გამოითვალონ დარჩენილი დღეების რაოდენობა;
• სოციალურ ქსელებში გააზიარონ კონკრეტული მოგზაურობის ან მოგზაურობის ისტორიის ამსახველი ვიზუალური ინფორმაცია.
აპლიკაცია სამენოვანია - ქართული, ინგლისური და რუსული.
"აპლიკაცია დამხმარე ხასიათისაა და ემსახურება მოსახლეობის ინფორმირებას. „Schengen/EU APP“-ს, ცხადია, არ გააჩნია რაიმე იურიდიული ძალა. აპლიკაცია სრულად შეესაბამება პერსონალურ მონაცემთა დაცვის შესახებ“ საქართველოს კანონს. აპლიკაციაში მითითებული ინფორმაცია ინახება მომხმარებლის მოწყობილობაზე" - აცხადებს იუსტიციის სამინისტრო.
აღსანიშნავია, რომ აპლიკაცია ერთად ითვლის როგორც შენგენის წევრ, ისე კანდიდატ ქვეყნებში ყოფნის პერიოდს.
