2016 წლის მანძილზე საქართველოს ეროვნულმა ბანკმა ლარის კურსის მკვეთრი მერყეობის შესაჩერებლად სავალუტო ინტერვენცია 23-ჯერ განახორციელა. ამ ინტერვენციებზე შესყიდული თანხის მოცულობამ $278 მილიონი შეადგინა, გაყიდული თანხა კი $240 მილიონია. ეროვნული ბანკის პრეზიდენტის, კობა გვენეტაძის თქმით, შეფასებების კეთებისას ხშირად ავიწყდებათ ის გარემოება, რომ სებ-მა გაყიდული რეზერვების მოცულობასთან შედარებით მეტი უცხოური ვალუტა შეისყიდა.
კობა გვენეტაძის თქმით, ეროვნული ბანკი ინტერვენციებს ახორციელებს მაშინ, როდესაც ლარის გაუფასურებას ფუნდამენტური მაკროეკონომიკური ფაქტორები არ იწვევენ და ამ ინსტრუმენტის გამოყენება ეროვნული ბანკის სტრატეგიაშიც შედის.
ეროვნული ბანკის ბოლო მონაცემებით (31 ოქტომბერი), საქართველოს სავალუტო რეზერვების მოცულობა $2.56 მილიარდია, ეს მაჩვენებელი წინა წლის მაჩვენებელთან შედარებით $314 მილიონით არის გაზრდილი, რაც ძირითადად 2016 წლის გაზაფხულის მანძილზე სებ-ის მიერ უცხოური ვალუტის შესყიდვას უკავშირდება.
იმის მიუხედავად, რომ 2015 წელთან შედარებით სავალუტო რეზერვების მოცულობა გაზრდილია, ის მაინც 11%-ით ჩამოუვარდება 2013 წლის ოქტომბრის მაჩვენებლებს, ამ პერიოდში სებ-ის სავალუტო რეზერვები დაახლოებით $2.9 მილიარდს შეადგენდა.
ეროვნული ბანკი უცხოურ ვალუტას იმ შემთხვევაში ყიდულობს, როდესაც ბაზარზე ვალუტის კურსი სწრაფად მერყეობს. თუკი კურსი მაღალი სიჩქარით უფასურდება, ამ დროს ბანკი სავალუტო რეზერვებს ყიდის, სწრაფი გამყარების პირობებში კი - ყიდულობს.