სახალხო დამცველი პენიტენციური დეპარტამენტის N6 დაწესებულებაში განთავსებული პატიმრის მიმართ თანამშრომლების მიერ სავარაუდო არასათანადო მოპყრობის ფაქტზე მთავარ პროკურორს მიმართავს და გამოძიების დაუყოვნებლივ გამოძიებისკენ მოუწოდებს.
"მსჯავრდებულმა გ.ბ.–მ სახალხო დამცველის რწმუნებულებთან განაცხადა, რომ 2016 წლის 3 სექტემბერს, დაწესებულებაში მსჯავრდებულების სატელეფონო საუბრებისთვის განკუთვნილ სპეციალურ ოთახში სატელეფონო საუბრის დასრულების შემდეგ, დაწესებულების რამდენიმე თანამშრომელმა მას სიტყვიერი და ფიზიკური შეურაცხყოფა მიაყენა. კერძოდ, თანამშრომლებმა პლასტმასის ხელკეტი დაარტყეს მარცხენა ხელზე, შემდეგ კი 2–3 წუთის განმავლობაში ფეხებს ურტყამდნენ. გ.ბ.–ს თქმით, მას დაწესებულების თანამშრომლები მოცემულ შემთხვევამდე ემუქრებოდნენ სასჯელის დამატებით, თუ არ შეწყვეტდა საჩივრების წერას, მათ შორის, სახალხო დამცველთან განცხადებების გაგზავნას, ხოლო დაწესებულების უსაფრთხოების უფროსმა და სამართლებრივი რეჟიმის უფროსმა მუქარის ტონით უთხრეს, რომ შეეწყვიტა საჩივრების წერა", - ნათქვამია განცხადებაში.
ომბუდსმენის ინფორმაციით, პატიმარს სხეულზე აღენიშნებოდა მრავლობითი დაზიანებები. ამასთან, ნიშანდობლივია, რომ საქართველოს სახალხო დამცველის რწმუნებულების მიერ პენიტენციური დეპარტამენტის N6 დაწესებულებაში არსებული ჟურნალების დათვალიერების შედეგად გაირკვა, რომ დაწესებულების მიერ მსჯავრდებულის დაზიანებები აღწერილი არ იყო და დაზიანებების შესახებ არც საგამოძიებო ორგანოში იყო გაგზავნილი შეტყობინება. დაწესებულების ექიმმა მსჯავრდებული დაწესებულების საგამოძიებო ოთახში დაათვალიერა და დაზიანებები აღწერა მხოლოდ 2016 წლის 7 სექტემბერს, საქართველოს სახალხო დამცველის რწმუნებულების მოთხოვნის შემდეგ.
"ჩატარდეს ყველა საჭირო და აუცილებელი საგამოძიებო მოქმედება, მათ შორის, დროულად ჩატარდეს სასამართლო-სამედიცინო ექსპერტიზა მსჯავრდებულის სხეულზე არსებული დაზიანებების ხარისხის, ხასიათის, ხანდაზმულობის, წარმოშობისა და განვითარების მექანიზმის დასადგენად; დროულად მოხდეს მითითებული ფაქტის ამსახველი ვიდეო-ჩანაწერების ამოღება საგამოძიებო ორგანოს მიერ", - ნათქვამია განცხადებაში.
