საკონსტიტუციო სასამართლოს მოსამართლის ოთარ სიჭინავას განცხადებით, არ აპირებს საქმის განხილვას იმ მოსამართლესთან ერთად, რომელზეც, სავარაუდოდ, ზეწოლა ხორციელდებოდა. ტაბულამ საკონსტიტუციო სასამართლოს მოსამართლეს ოთარ სიჭინავას ჰკითხა, "ადამიანის თავისუფლება რა ნიშნითაა ნაკლებად საჩქარო, ვიდრე დიპლომატებისათვის ინფორმაციის მიწოდება". აღსანიშნავია, რომ დღეს სამი მოსამართლე - ოთარ სიჭინავა, ლალი ფაფიაშვილი და ზაზა თავაძე დიპლომატებთან შეხვედრის მიზეზით, გიგი უგულავას და ე.წ. კაბელების საქმეზე ჩანიშნულ სხდომას არ დაესწრო. კვორუმის არარსებობის გამო, სარჩელების განხილვა გადაიდო.
ტაბულას კითხვაზე, "რატომ არ შეიძლებოდა, რომ დიპლომატებთან შეხვედრა სხვა დროს ჩანიშნულიყო, რადგან ემთხვეოდა სხდომას", ოთარ სიჭინავა პასუხობს, რომ აქვთ სხვა საქმეებიც.
"მაგალითად, არის უზენაესი სასამართლოს რამდენიმე წარდგინება, სადაც, რამდენადაც მახსოვს, საუბარია ასევე ხანგრძლივი ვადით პატიმრებზე. არ არის ჯერჯერობით გადაწყვეტილება მიღებული. გარდა ამისა, სასამართლოს თავმჯდომარის განცხადებით, ზეწოლაზე იყო საუბარი. თავმჯდომარე გამოკითხული არ არის, ყველა დანარჩენმა უარყო. გამოიკითხება ალბათ ბატონი გიორგიც, ეს პროცედურა დასრულდება და გაირკვევა ალბათ - სად არის სიმართლე. მეორე მხარე კი არის, ე.წ. კაბელების საქმეზე სარჩელების ჩანაცვლების თემა, რომელსაც თქვენ რატომღაც არ ეხებით. ამ საკითხსაც გავარკვევთ - რა მოხდა, როგორ მოხდა და ამის შემდეგ ვისაუბრებთ", - განაცხადა სიჭინავამ და აღნიშნა, რომ რაზეც საჭიროდ ჩათვალა, იმაზე გასცა პასუხი.
კითხვაზე, "დღეს რატომ არ დაესწარით სხდომას? არ იყო ამ სხდომაზე დასწრება მნიშვნელოვანი, როცა ადამიანების თავისუფლების აღკვეთის კონსტიტუციურობის საკითხი განიხილება?" - სიჭინავა პასუხობს - "ნუ განმიმარტავთ, კონსტიტუციაში რა წერია. რომელიღაც მოსამართლეზე ზეწოლაზე იყო საუბარი. შესაბამისად, სანამ არ გაირკვევა, რამდენ მოსამართლეზე იყო ზეწოლა... ნამდვილად არ ვაპირებ საქმის განხილვას იმ მოსამართლესთან ერთად, რომელზეც, სავარაუდოდ, ზეწოლა ხორციელდებოდა, შესაბამისად, არაობიექტურ გადაწყვეტილებას მიიღებდა. ე.წ. კაბელების საქმე არის გაერთიანებული იმ საქმესთან, რომელზეც თქვენ მესაუბრებით [გიგი უგულავას საქმე]. 182-ე მუხლია იქაც გასაჩივრებული და ის მოსამართლე იმ საქმეშიც მონაწილეობს, რომელზეც ამბობენ, რომ ზეწოლა ხორციელდება. თქვენ მე მთავაზობთ, უგულავას საქმე განიხილოს თეორიულად მოსამართლემ, რომელზეც ვიღაც ზეწოლას ახდენს? მე როგორ უნდა გადავწყვიტო საქმე, როდესაც ეჭვი მაქვს, რომ რომელიღაც მოსამართლეზე ზეწოლა ხორციელდება? თან იმ საქმეზე, სადაც პატიმარია, წარმოიდგინეთ აბსურდულობა. ამიტომ, უნდა გაირკვეს - არის თუ არა ზეწოლა".
კითხვაზე, "გაქვთ იმედი, რომ პროკურატურა ზეწოლის საქმეს გამოიძიებს მაშინ, როდესაც თავად აღმასრულებელი ხელისუფლებაა დადანაშაულებული?", მოსამართლე ამბობს, რომ "ერთადერთი კონსტიტუციური ორგანო, რომელიც ვალდებულია, გამოიძიოს, არის პროკურატურა. მე აქ ვერაფერს ვერ ვიზამ. სხვა ამას ვერავინ გამოიძიებს. პროკურატურამ უნდა გააკეთოს ეს. მე სხვა ორგანოების საქმიანობაზე კომენტარებს, რეკომენდაციებს და ა.შ. ვერ მოგცემთ".
ოთარ სიჭინავა არ პასუხობს კითხვას, თუ ახსენდება რომელიმე საქმე, როდესაც აღმასრულებელმა ხელისუფლებამ გამოიძია ისეთი საქმე, სადაც თავად ხელისუფლება იყო დადანაშაულებული.
"ჩვენ ვართ მოსამართლეები. ჩვენ არ ვართ რაღაც სხვა პროფესიის ადამიანები. ჩვენ არ გვაქვს უფლება, ამ თემებზე იმ კონტექსტში ვისაუბროთ, რომელსაც თქვენ გვთხოვთ. მახსენდება თუ არ მახსენდება, ეს ჩემი კომპეტენციის ფარგლებს ცდება და ამაზე კომენტირების უფლება არ გამაჩნია. არ მიმაჩნია, რომ ეს სწორია, ჩვენს სტანდარტებში არ ჯდება. აქედან გამომდინარე, ამ კითხვაზე პასუხს არ გაგცემთ. ზეწოლა მოსამართლეზე, ნიშნავს დანაშაულის შესაძლებლობას. თუ დანაშაულია ჩადენილი მოსამართლის მიმართ, შესაბამისმა ორგანომ უნდა გამოიძიოს, რომელიც ჩვენ გვყავს. სხვა ორგანო რომ ყოფილიყო, მაგალითად FBI რომ ყოფილიყო, ის გამოიძიებდა. არის რაღაცები რაზეც ვერ ვისაუბრებთ იმიტომ, რომ ამის უფლება არ გვაქვს. მთლიანობაში, ვადასტურებ ჩემს პატივისცემას ყველა ორგანოს მიმართ. მიმაჩნია, რომ უნდა გამოვიდეთ ადმინისტრაციული ორგანოების კეთილსინდისიერების პრინციპიდან გამომდინარე, თავისი უფლებამოსილების განხორციელების პროცესში", - აცხადებს სიჭინავა.
აქვე შეგახსენებთ, რომ მთავარი პროკურატურის განცხადებით, საკონსტიტუციო სასამართლოს მოსამართლეები რაიმე სახის ზეწოლის ფაქტს უარყოფენ. უწყების განმარტებით, გამოკითხეს საკონსტიტუციო სასამართლოს ყველა მოსამართლე თავმჯდომარის გარდა. საქართველოს პროკურატურამ საკონსტიტუციო სასამართლოს თავმჯდომარის გიორგი პაპუაშვილის საჯარო განცხადებების საფუძველზე დაწყებული გამოძიების შუალედური შედეგების შესახებ ინფორმაცია გუშინ გაავრცელა.
საკონსტიტუციო სასამართლოს თავმჯდომარემ გიორგი პაპუაშვილმა მოსამართლეებზე ზეწოლის შესახებ 21 ივლისს ისაუბრა. პაპუაშვილმა საგანგებო ბრიფინგზე თქვა, რომ მოსამართლეებს ფარულად უთვალთვალებენ და ემუქრებიან.
