კოალიცია მედიის ადვოკატირებისთვის ტელეკომპანია რუსთავი 2–ის გარშემო განვითარებულ მოვლენებთან დაკავშირებით განცხადებას ავრცელებს. კოალიციაში შემავალი ორგანიზაციების შეფასებით, მნიშვნელოვანია, რომ მმართველი გუნდის ყველა წევრმა კარგად გაიაზროს ნიკა გვარამიას მიერ გავრცელებული ინფორმაციის სიმძიმე. მათი განცხადებით, ხელისუფლება ვალდებულია დაადასტუროს, რომ ადგილი არ აქვს ჟურნალისტების და მედიის სხვა წარმომადგენლების მიმართ თვალთვალსა და შანტაჟს. ან სასწრაფოდ გამოავლინოს და პასუხისგებაში მისცეს დამნაშავეები. განცხადებას უცვლელად გთავაზობთ:
"2015 წ. 21 ოქტომბერს ტელეკომპანია რუსთავი 2-ს გენერალური დირექტორის მიერ გაკეთებული განცხადება, რომ მას აშანტაჟებდნენ პირადი ცხოვრების ამსახველი ვიდეომასალის გავრცელებით, კიდევ უფრო აძლიერებს ეჭვებს იმის თაობაზე, რომ ტელეკომპანიის წინააღმდეგ დაწყებული დავა ცდება კერძო-სამართლებრივ ჩარჩოებს. სექტემბერში ჟურნალისტ ეკა მიშველაძის მიერ გაკეთებულ განცხადებას უკანონო თვალთვალის შესახებ არ მოჰყოლია ეფექტური რეაგირება. გარდა ამისა, მედიაში გავრცელდა კადრები, სადაც ჩანს ლანჩხუთში 21 ოქტომბერს მომხდარი ინციდენტი, რომლის დროსაც ლანჩხუთის გამგეობის თანამშრომელმა შეურაცხყოფა მიაყენა და პროფესიულ საქმიანობაში ხელი შეუშალა რუსთავი 2-ის ადგილობრივ კორესპონდენტს.
ასეთ ვითარებაში ხელისუფლება ვეღარ შემოიფარგლება ზოგადი განცხადებებით. მნიშვნელოვანია, რომ მმართველი გუნდის ყველა წევრმა კარგად გაიაზროს ნიკა გვარამიას მიერ გავრცელებული ინფორმაციის სიმძიმე. ხელისუფლება ვალდებულია დაადასტუროს, რომ ადგილი არ აქვს ჟურნალისტების და მედიის სხვა წარმომადგენლების მიმართ თვალთვალსა და შანტაჟს ან სასწრაფოდ გამოავლინოს და პასუხისგებაში მისცეს ამ მძიმე დანაშაულების ჩამდენი პირები.
ვშიშობთ, რომ პრემიერმინისტრ ირაკლი ღარიბაშვილის მიერ 22 ოქტომბერს გაკეთებულმა განცხადებებმა შესაძლოა წაახალისოს პოლიტიკური აქტივისტები და საჯარო მოხელეები და გახშირდეს ჟურნალისტების შეურაცხყოფისა და საქმიანობაში ხელშეშლის ფაქტები.
მოვუწოდებთ საქართველოს მთავრობისა და პარლამენტის წევრებს, რომ პოლიტიკურ ინტერესებზე მაღლა დააყენონ მედიის თავისუფლება, არ წაახალისონ ძალადობა და საკუთარი საქმიანობის ფარგლებში აღკვეთონ თავდასხმები ჟურნალისტებზე.
მედიის შანტაჟი და თავდასხმა ჟურნალისტებზე დიდ საფრთხეს შეიცავს არა მარტო მედიის თავისუფლების, არამედ ქვეყნის დემოკრატიული განვითარების თვალსაზრისითაც. როგორც მედიის შეზღუდვის მცდელობა, ასევე მედიის შეზღუდვის ცალკეულ ფაქტებზე არასათანადო რეაგირება, ნებისმიერი ხელისუფლებისთვის საზოგადოების ნდობისა და მხარდაჭერის დაკარგვის ტოლფასია. ჩვენი საზოგადოება ყოველთვის დაიცავს მედიის თავისუფლებას, როგორც დემოკრატიის უმთავრეს ღირებულებას" - ნათქვამია განცხადებაში.
კოალიცია მედიის ადვოკატირებისთვის წევრი ორგანიზაციები არიან საქართველოს ახალგაზრდა იურისტთა ასოციაცია, მედიაკლუბი, საქართველოს ჟურნალისტური ეთიკის ქარტია, ინფორმაციის თავისუფლების განვითარების ინსტიტუტი, ფონდი ღია საზოგადოება - საქართველო, საქართველოს რეგიონულ მაუწყებელთა ასოციაცია, სამოქალაქო განვითარების ინსტიტუტი, არასამთავრობო ორგანიზაცია სამოქალაქო საზოგადოებისათვის, ლევან მიქელაძის სახელობის ფონდი, საქართველოს რეგიონული მედიის ასოციაცია, სატელევიზიო ქსელი.
