საქართველოს ღვინის ეროვნულმა სააგენტომ ღვინის ექსპორტის შესახებ ახალი მონაცემები გაავრცელა. 2014 წლის პირველ 9 თვეში მსოფლიოს 39 ქვეყანაში ღვინის ექსპორტმა 42 მილიონი (0,75 ლ) ბოთლი შეადგინა, რაც გასული წლის სექტემბრის მონაცემებს 62%-ით აღემატება.
ქართული ღვინის ექსპორტის 65% პროცენტი რუსეთზე მოდის, აღნიშნული ბაზრის გახსნის შემდეგ რუსეთი ქართული ღვინის ექსპორტის უმსხვილესი ბაზარი გახდა. საექსპორტო ქვეყნების ხუთეულში მოხვდნენ უკრაინა, ყაზახეთი, პოლონეთი და ბელარუსი.
საექსპორტო ქვეყნების ათეულში მოხვდნენ: ჩინეთი, ლიტვა, ლატვია, ესტონეთი და აზერბაიჯანი.
სააგენტოს მონაცემებით, ღვინის ექსპორტმა $137 მილიონი შეადგინა, რაც 64%-ით აღემატება 2013 წლის შესაბამისი პერიოდის ანალოგიურ მაჩვენებელს.
სექტემბრის მონაცემებით, საქართველოდან ექსპორტირებულია 8 მილიონი (0,5ლ) ბოთლი ბრენდი. ბრენდის ექსპორტიორ ქვეყნებში კვლავ ლიდერობს უკრაინა, სადაც ცხრა თვის მონაცემებით, ექსპორტირებულია 4 მილიონი ბოთლი. მეორე ადგილს 3 მილიონი ბოთლით რუსეთი იკავებს.
ბრენდის ექსპორტმა $29 მილიონს მიაღწია, რაც 41%-ით აღემატება გასული წლის შესაბამისი პერიოდის ანალოგიურ მაჩვენებელს.