ქართველი დეპუტატები ბაქოში

ქართული ოცნება: რატომ არკვევდნენ მარნეულისა და გარდაბნის საკითხებს ბაქოში?

კოალიცია ქართული ოცნების განცხადებით, "გუშინდელი პროვოკაციული ინციდენტის შემდეგ, ნაციონალური მოძრაობის მასში მონაწილე წევრები, ნაცვლად იმისა, რომ აეხსნათ მოსახლეობისთვის, თუ რატომ და როგორ აღმოჩნდნენ ქვეყნის საერთაშორისო იმიჯის შემლახველ უხერხულ სიტუაციაში, მათთვის ჩვეული სიცრუის ტირაჟირებით შეეცადნენ მომხდარის გადაფარვას". როგორც დღევანდელ ბრიფინგზე გიორგი გეგეჭკორმა აღნიშნა, ზურაბ ჯაფარიძის თქმით, ენმ-ის დეპუტატები აზერბაიჯანში მარნეულსა და გარდაბანში განვითარებული მოვლენების განსახილველად იმყოფებოდნენ.

"ეს განცხადება ძალიან საყურადღებოა. ჩვენ გვაქვს ლეგიტიმური უფლება, მოვითხოვოთ პასუხი კითხვაზე - რატომ და ვისთან არკვევდნენ ჩვენი პარლამენტის დეპუტატები მარნეულისა და გარდაბნის საკითხებს აზერბაიჯანში, მიუხედავად იმისა, რომ აზერბაიჯანი ჩვენი არა მხოლოდ მეზობელი, არამედ მთავარი სტრატეგიული პარტნიორიცაა. ჩვენთვის ძალიან მნიშვნელოვანია საქართველო-აზერბაიჯანის მჭიდრო მეგობრული და კეთილმეზობლური ურთიერთობები, ჩვენ პატივს ვცემთ საქართველოში მცხოვრები ჩვენი აზერბაიჯანელი მოქალაქეების არჩევანს, ამიტომ ვერ დავუშვებთ, რომ რომელიმე პოლიტიკურმა ძალამ ჩრდილი მიაყენოს ქართულ-აზერბაიჯანულ ურთიერთობებს. ჩვენ არაერთგზის განვმარტეთ და კიდევ ვიმეორებთ, რომ შესაძლო ეთნიკური დაპირისპირების თავიდან აცილების მიზნით, ქართულმა ოცნებამ მოხსნა თავისი კანდიდატურა მარნეულში. ჩვენი წარმომადგენლის გამარჯვება კი იმის დემონსტრირებაა, რომ ამ რეგიონში არანაირი ეთნიკური დაპირისპირება არ არსებობს, ხალხი ერთმანეთს ენდობა და არჩევანს ღირსეული კანდიდატის სასარგებლოდ აკეთებს", - აცხადებს ქართული ოცნება და ამატებს - "მომხდარი ფაქტი კიდევ ერთხელ ადასტურებს,  რომ ნაციონალური მოძრაობა პირადი ინტერესების მისაღწევად ყველაფერზე წამსვლელი ძალაა".

ქართული ოცნება მოუწოდებს ერთიან ნაციონალურ მოძრაობას, "მეტი ყურადღებით მოეკიდოს ქვეყნისთვის მეტად საფრთხილო საკითხებით მანიპულირებას და გადავიდნენ ჯანსაღი პოლიტიკური კონკურენციის რეჟიმში, რისი ყველა პირობაც ჩვენმა ხელისუფლებამ არჩევნებში მონაწილე ნებისმიერ საარჩევნო სუბიექტს შეუქმნა".

საინფორმაციო სააგენტო ინტერპრესნიუსმა გუშინ გაავრცელა ინფორმაცია აზერბაიჯანელი მესაზღვრეების მიერ საპარლამენტო უმცირესობის წევრების ირმა ნადირაშვილისა და ზურაბ ჯაფარიძის შესაძლო დაკავების შესახებ, საზღვარზე ელექტროშოკური აპარატების და დიდი ოდენობით ფულადი თანხის გადმოტანის მცდელობის ფაქტზე. აღნიშნული ინფორმაცია აზერბაიჯანში საქართველოს ელჩმაც დაადასტურა და განაცხადა, რომ "დეპუტატებს არადეკლარირებული თანხა ჰქონდათ".

თავად ზურაბ ჯაფარიძემ და ირმა ნადირაშვილმა უარყვეს დაკავების ფაქტი. ჯაფარიძის ვარაუდით, ქართული სპეცსამსახურები იმ პირებს უსმენდნენ, ვისაც დეპუტატი თბილისში ირმა ნადირაშვილის ვაიბერის საშუალებით უკავშირდებოდა.

„მე და გოგა ხაჩიძემ სატელეფონო საუბრისას ისეთი განცდა შევქმენით, რომ თითქოს რაღაც მოგვქონდა, გვეგონა, აქ პოლიცია დაგვხვდებოდა და გავერთობოდით, მაგრამ გაცილებით უარესი აღმოჩნდა, ბაქოს აეროპორტში საქართველოს მთელი საელჩო დაგვხვდა. მე და ირმა ნადირაშვილმა ელჩთან შეხვედრა ვცადეთ, მაგრამ ვერ მოვახერხეთ. ნაცვლად იმისა, რომ საელჩოს წარმომადგენლები ჩვენ შეგვხვედროდნენ, მითხრეს, რომ ისინი მებაჟეებს ეკითხებოდნენ - ვიყავით თუ არა დაპატიმრებულები, ამათ რამდენი ელექტროშოკი აღმოაჩნდათო. გარდა ამისა, დიდი ალბათობით საქართველოს სპეცსამსახურების წარმომადგენლები დადიოდნენ და ფოტოებს გვიღებდნენ. ამის შემდეგ ირმას და მე 30 წუთის განმავლობაში გვჩხრეკდნენ. ამის გამო თვითმფრინავმა 40 წუთით დააგვიანა“, - თქვა საპარლამენტო უმცირესობის წევრმა ზურაბ ჯაფარიძემ ტაბულას ეთერში, თოქშოუ თეორემაში პირდაპირი ჩართვისას.

კომენტარები