საზოგადოებრივი მაუწყებლის სამეურვეო საბჭო

მოქალაქეები პარლამენტს GPB-ის მეურვეების შერჩევასთან დაკავშირებით მიმართავენ

საქართველოს საზოგადოებრივი მაუწყებელი

საქართველოს მოქალაქეთა ნაწილი საქართველოს პარლამენტს პეტიციით მიმართავს და მოუწოდებს, საზოგადოებრივი მაუწყებლის სამეურვეო საბჭოს წევრები იმ 27 პირიდან დანიშნოს, რომლებიც სპეციალურად შერჩეულმა კომისიამ კონკურსის გზით შეარჩია.

"ჩვენ, საზოგადოების წარმომადგენლები, ყურადღებით ვადევნებთ თვალს საზოგადოებრივი მაუწყებლის მეურვეთა საბჭოს დაკომპლექტების პროცესს. ვფიქრობთ, რომ პარლამენტის მიერ დანიშნულმა შესარჩევმა კომისიამ სანიმუშოდ გაართვა თავი დაკისრებულ მოვალეობას, შეასრულა კანონის მოთხოვნა და საზოგადოების დაკვეთა, პროცესი წარმართა გამჭვირვალედ და მიუკერძოებლად, დაინტერესებულ საზოგადოებას საშუალება მისცა პირდაპირ ეთერში ედევნებინა თვალი კანდიდატებთან გასაუბრებისთვის და მეურვეობის 68 მსურველიდან შეარჩია 27 ღირსეული კანდიდატი.

სამწუხაროდ, პარლამენტმა ვერ შეძლო წარდგენილი სიიდან სასურველი კანდიდატების ამორჩევა. დემოკრატიულად დაწყებული პროცესი შეფერხდა. საპარლამენტო უმრავლესობის წევრთა განცხადებით, იგეგმება ხელახალი კონკურსი, რაც მოიცავს საფრთხეს, რომ საზოგადოებრივი მაუწყებლის საბჭოში კიდევ ერთხელ აღმოჩნდნენ პოლიტიკური ნიშნით არჩეული კანდიდატები. ამით დაზარალდება როგორც მაუწყებელი, ასევე ჩვენი ქვეყნის დემოკრატიული განვითარების პროცესი.

მოვუწოდებთ პარლამენტის წევრებს, რომ გაითვალისწინონ საზოგადოების მაღალი ინტერესი, მიაღწიონ რთულ, მაგრამ აუცილებელ შეთანხმებას, აირჩიონ მეურვეები დასახელებული 27 კანდიდატიდან და ხმა მისცენ საზოგადოებრივი მაუწყებლის ერთხელ და სამუდამოდ გათავისუფლებას პოლიტიკური კონტროლისაგან", - წერია პეტიციაში.

დოკუმენტი ღიაა ხელმოსაწერად და მასზე ხელმოწერა ნებისმიერ მსურველს ონლაინ შეუძლია. 8 იანვრის 11:30 საათის მონაცემებით, პეტიციას ხელს 270-მდე მოქალაქე აწერს.

კომენტარები