აშშ ერთგული რჩება თავის პოზიციისა, მხარი დაუჭიროს საქართველოს საკუთარი მისწრაფებების რეალობად გადაქცევაში, - ამის შესახებ აშს-ის სახელმწიფო მდივნის მეორე მოადგილემ ევროპისა და ევრაზიის საკითხებში, ერიკ რუბინმა, ბიძინა ივანიშვილთან შეხევდრის შემდეგ გამართულ პრესკონფერენციაზე განაცხადა.
როგორც ერიკ რუბინმა აღნიშნა, მისი ვიზიტის მიზანი ორმხრივი ურთიერთობების განხილვაა სტრატეგიული და უსაფრთხოების კუთხით.
"ჩვენ ასევე აქ ვართ იმისთვის, რომ ვისაუბროთ, როგორ შეიძლება გავაგრძელოთ წინსვლა საქართველოს ევროატლანტიკური მისწრაფებების კუთხით, ევროკავშირსა და NATO-ში გასაწევრიანებლად და როგორ გავაღრმაოთ ჩვენი პარტნიორობა ავღანეთსა და ბევრ სხვა სივრცეში, სადაც ქართველები და ამერიკელები ერთად მსახურობენ. ეს ძალზე წარმატებული ისტორიაა და ჩვენ ვაპირებთ, ეს ისტორია გავაგრძელოთ", - განაცხადა ერიკ რუბინმა.
შეგახსენებთ, აშშ-ის სახელმწიფო მდივნის მოადგილე ევროპისა და ევრაზიის საკითხებში, ერიკ რუბინი, საქართველოში ორდღიანი ვიზიტით იმყოფება. ვიზიტის ფარგლებში დაგეგმილია შეხვედრები საგარეო საქმეთა მინისტრ მაია ფანჯიკიძესთან, უშიშროების საბჭოს მდივან გიგა ბოკერიასთან, ასევე არასამთავრობო და საერთაშორისო ორგანიზაციების წარმომადგენლებთანაც.