სტიქიის შედეგად დაზარალებული მოსახლეობა საკომპენსაციო თანხებს, სავარაუდოდ, 15 აგვისტომდე მიიღებს. ამის შესახებ ტრადიციულ ბრიფინგზე პრეზიდენტის პრესსპიკერმა მანანა მანჯგალაძემ განაცხადა.
მანანა მანჯგალაძის განმარტებით, დღეს პარლამენტში საბიუჯეტო ცვლილებებთან დაკავშირებით საკომიტეტო მოსმენები იმართება, ხვალ კი ჩანიშნულია რიგგარეშე სხდომაც, სადაც სტიქიასთან დაკავშირებულ ცვლილებებს პარლამენტი დაამტკიცებს, ამის შემდეგ საკომპენსაციო თანხების დარიგება დაიწყება.
”მთლიანობაში, საბიუჯეტო ცვლილებებით გათვალისწინებულია 160 მილიონი ლარის მობილიზება. 50 მილიონით დაფინანსდება სტიქიის შედეგების სალიკვიდაციოდ განსახორციელებელი გადაუდებელი ღონისძიებები. მათ შორის არის დაზიანებული სახლების რეაბილიტაცია, დაზარალებული მოსახლეობის საკვები პროდუქტებით მომარაგება და სასოფლო-სამეურნეო სავარგულების მფლობელებისთვის კომპენსაციის გადაცემა”, - განაცხადა მანჯგალაძემ.
პრეზიდენტის პრესსპიკერის თქმით, მხოლოდ კახეთის რეგიონში სტიქიის შედეგად 3 ათასი სახლი დაზიანდა და მათ 80%-ზე უკვე მიმდინარეობს სარეაბილიტაციო სამუშაოები. მისივე თქმით, კახეთში 28 ათას ოჯახს უნდა მიეღო სასურსათო პაკეტი, რომელიც 14 ათასზე მეტმა ოჯახმა უკვე მიიღო. მანანა მანჯგალაძის განცხადებით, კახეთის რეგიონში ელექტროენერგიის მიწოდება, სავარაუდოდ, 26 ივლისისთვის სრულად აღდგება.
