ბიძინა ივანიშვილი პოლიტიკური პარტიის საინიციატივო ჯგუფს 15 თებერვალს წარადგენს, ამის შესახებ დღეს ”ქართული ოცნების” პრეს-სპიკერმა მაია ფანჯიკიძემ განაცხადა. საზოგადოებრივი ორგანიზაციის ოფისში გამართულ ორშაბათის ბრიფინგზე მან განმარტა , რომ დაახლოებით 20 პირისგან შემდგარ საინიციატივო ჯგუფს საზოგადოებას პირადად ბიძინა ივანიშვილი წარუდგენს.
"მათ შორის არიან, როგორც აკადემიური წრეების წარმომადგნელბი, ასევე - ექსპერტები, უფლებადამცველები, იურისტები, საზოგადოებისთვის ცნობილი სახეები სახელოვნებო თუ ჟურნალისტთა წრეებიდან, ასევე საზღვარგარეთ მოღვაწე წარმატებული ქართველები. აბსოლუტურად დაცულია ასაკობრივი და გენდერული ბალანსი. მათ ნაწილს საზოგადოება იცნობს, თუმცა 15-დან ახალ ამპლუაში გაიცნობს", - აღნიშნა ”ქართული ოცნების” პრეს-სპიკერმა . მისი მინიშნებით, ლაპარაკია საზოგადოებისთვის ცნობილ ადამიანებზე, თუმცა ისინი აქამდე პოლიტიკაში არ ყოფილან.
