კოალიცია ცვლილებისთვის ერთ-ერთმა ლიდერმა ელენე ხოშტარიამ სატელეფონო ჩანაწერში, რომელიც ALDE-ს კონგრესზე გააჟღერეს, განაცხადა, რომ ქართველები ჰიბრიდულ ომში არიან და რუსეთი ცდილობს დაამარცხოს ევროპა საქართველოში.
ხოშტარიას მიმართვას, რომელსაც პარტია დროა ავრცელებს, უცვლელად გთავაზობთ:
უპირველეს ყოვლისა, მინდა მადლობა გადაგიხადოთ ყველას ჩემი ქვეყნის, ჩემი ხალხის მხარდაჭერისთვის და, რაც მთავარია, თქვენი ლიდერობისთვის. ეს არის საკვანძო სიტყვა: თქვენი ლიდერობა უაღრესად მნიშვნელოვანია. ეს მნიშვნელოვანია, რადგან ის აჩვენებს და ადასტურებს ჩვენი საერთო ღირებულებებისადმი ერთგულებას.
ეს ღირებულებები არ არის ცარიელი სიტყვები, არამედ მოქმედებისადმი რეალური ერთგულება. მეორეც, ეს ყველასთვის მნიშვნელოვანი გზავნილია, რადგან რუსეთს სურს გამყოფი ხაზების შექმნა. მას სურს ჩვენი ერთმანეთისგან ფრაგმენტირება და იზოლირება. სინამდვილეში კი ის ერთიანობას და ლიდერობას ხედავს.
რუსეთს სურს შიშის შექმნა და ის მეტ გამბედაობას იღებს. რუსეთს სურს გვნახოს დაყოფილნი და ჩვენ კიდევ უფრო გაერთიანებულები ვართ. ამიტომ, ყოველ ჯერზე, როცა ვხედავ თქვენს ქმედებებს და ვისმენ თქვენს განცხადებებს, ძვირფასო მეგობრებო ALDE-ში, არა მხოლოდ მადლიერი ვარ, არამედ ვამაყობ, რომ თქვენი ოჯახის წევრი ვარ.
ახლა ერთი თხოვნა მაქვს. რადგან არ მაქვს შესაძლებლობა, უკრაინაში ჩემს მეგობრებთან ვიმოგზაურო და მხარი დავუჭირო მათ, მინდა ეს შეკრება გამოვიყენო და მივმართო ჩემს მეგობრებს უკრაინაში: ძვირფასო უკრაინელო დებო და ძმებო, ჩვენ ვგრძნობთ თქვენს ტკივილს, ვხედავთ თქვენს გამბედაობას და გვჯერა თქვენი. ჩვენ გვჯერა თქვენი გამარჯვების, რომელიც მთელ რეგიონში მშვიდობას მოიტანს.
პრეზიდენტო ზელენსკი, ჩვენ მივესალმებით თქვენს ლიდერობას. ჩვენ მივესალმებით მას, რადგან ეს არისნლიდერობა სიმაეთლეში, ლიდერობა ღირებულებებში და ლიდერობა თავისუფლებისთვის.
ახლა კი, გადავიდეთ საქართველოზე: უკრაინელები იბრძვიან ცხელ ომში, ხოლო ქართველები ჰიბრიდულ ომში. თუმცა, გამოწვვევა იგივეა - რუსეთი ცდილობს, დაამარცხოს ევროპა საქართველოში. მას სურს, რომ ევროპა დამარცხდეს საქართველოში. მას სურს, რომ ქართველი ხალხი დამარცხდეს. მას სურს, რომ ყველა თავისუფალი მოქალაქე დამარცხდეს მსოფლიოს ნებისმიერ კუთხეში.
სწორედ ამიტომ, ჩვენს წინაშე არსებული გამოწვევა არ არის მხოლოდ ქართული გამოწვევა - ეს არის გამოწვევა მთელი ევროპისთვის, მთელი მსოფლიოსთვის და ევროპული ღირებულებებისთვის. მაგრამ ამავე დროს, ჩვენ ვხედავთ, რომ ქართველი ხალხი არ მარცხდება. ჩვენ არ ვმარცხდებით. ჩვენ არ ვნებდებით. არ აქვს მნიშვნელობა, ციხეში ვართ თუ ქუჩაში, გვცემენ თუ არა, გვავიწროებენ თუ არა, გვეშინია თუ არა, ან რასაც ვაწყდებით, ჩვენ ვიბრძვით. ჩვენ ვიბრძვით, რადგან გვჯერა ამ ჭეშმარიტების. ჩვენ გვჯერა ჩვენი ქვეყნის. ჩვენ გვჯერა ჩვენი სახელმწიფოებრიობის. ჩვენ გვჯერა ევროპული საქართველოსი.
ასე რომ, სტრატეგიული სურათის გათვალისწინებით, საქართველო არ არის უბრალოდ კიდევ ერთი დემოკრატიული კრიზისი, რომელიც შეიძლება თავის ტკივილი იყოს ევროპისთვის. საქართველო არის შანსი, რომელიც უნდა გამოვიყენოთ. ეს არის შანსი ევროპისთვის, აჩვენოს, რომ ჩვენ ყველანი წარმატებას მივაღწევთ მე-19 საუკუნის ძალადობრივ, აგრესიულ, ტერორისტულ ძალებთან ბრძოლაში. ჩვენ გავიმარჯვებთ და ვაჩვენებთ, რომ ისტორიის სწორ მხარეს ვართ!
