პოლონეთის თავდაცვის მინისტრმა, ვლადისლავ კოშინიაკ-კამიშმა 29 ივნისს Polsat News-თან საუბრისას განაცხადა, რომ პოლონეთმა უკრაინას დამატებითი MiG ავიაგამანადგურებლები არ გადასცა, რადგან კიევმა სანაცვლოდ დაპირებული დრონების ტექნოლოგია არ მიაწოდა.
"მე შევთავაზე ის, რაც ჩემი აზრით, ძალიან სამართლიანი, პარტნიორობაზე დაფუძნებული მიდგომა იყო: MiG-ები დრონების სანაცვლოდ“, - განაცხადა კოშინიაკ-კამიშმა.
"უკრაინელებმა თავდაპირველად მიიღეს ეს, მაგრამ არ შეასრულეს ეს მოთხოვნა, ამიტომ უკრაინას არ აქვს მიგ-ები, რადგან პოლონეთს არ აქვს დრონები ან დრონების გამოყენების შესაძლებლობები," - თქვა თავდაცვის მინისტრმა.
პოლონეთის მთავრობამ იანვარში დაადასტურა, რომ მან დაამტკიცა უკრაინისთვის ცხრა MiG-29 ტიპის გამანადგურებლის გადაცემა , რადგან პოლონეთი თანდათანობით ანაცვლებს საბჭოთა ეპოქის თვითმფრინავებს აშშ-ის წარმოების F-16-ებითა და F-35-ებით.
თუმცა, პოლონელმა მაღალჩინოსნებმა ივნისის დასაწყისში განაცხადეს, რომ გადაცემა გადაიდო, რადგან უკრაინული სამხედრო ტექნოლოგიების პოლონეთში გადაცემის შესახებ მოლაპარაკებები კვლავ გადაუჭრელი რჩება.
კოშინიაკ-კამიშის კომენტარები ასევე ეჭვქვეშ აყენებს უკრაინა-პოლონეთის თანამშრომლობას დრონების ტექნოლოგიაში. პოლონეთის პრემიერმინისტრმა დონალდ ტუსკმა აპრილში განაცხადა, რომ უკრაინა დათანხმდა თავისი ექსპერტიზის გაზიარებას, რათა დაეხმაროს პოლონეთის შეიარაღებულ ძალებს თანამედროვე დრონების ფლოტის შექმნაში.
პოლონეთის თავდაცვის მინისტრის თქმით, უკრაინას გააჩნია როგორც მოწინავე სამხედრო დრონების შესაძლებლობები, ასევე ფართო ოპერატიული ექსპერტიზა, რომლის გაზიარებაც პარტნიორებთან შეუძლია.
"ისინი ამაში მართლაც ძალიან კარგები არიან. ისინი დათანხმდნენ ამის გაკეთებას, მაგრამ მოგვიანებით უარი თქვეს ამ შეთანხმებებზე," - თქვა მან.
