ირანის წინააღმდეგ საბრძოლო კამპანიის ფონზე აშშ-სა და ისრაელის არმიების მეთაურებმა ხუთშაბათს, 5 მარტს, განაცხადეს, რომ საჰაერო იერიშების შედეგად წარმატებით მოხდა ირანის სარაკეტო საფრთხის განადგურება. მათ ასევე განაცხადეს, რომ მომდევნო დღეებში ირანის წინააღმდეგ იერიშები უფრო ინტენსიური გახდება.
ამის მიუხედავად, ირანი განაგრძობს ისრაელისა და სპარსეთის ყურის ქვეყნების წინააღმდეგ ბალისტიკური რაკეტებისა და დრონების გაშვებას.
ისრაელის თავდაცვის ძალების (IDF) გაერთიანებული შტაბის უფროსმა, გენერალ-ლეიტენანტ ეიალ ზამირმა განაცხადა, რომ იერიშების შედეგად განადგურებულია ირანის საჰაერო თავდაცვის 80% და მათი რაკეტების გამშვები დანადგარების 60%, თუმცა, მან დაამატა, რომ "საფრთხე ჯერ კიდევ არ გამქრალა".
თავის მხრივ, აშშ-ს ცენტრალური სარდლობის მეთაურმა, ბრედ კუპერმა აღნიშნა, რომ ირანის მხრიდან ბალისტიკური რაკეტებით თავდასხმებმა ომის პირველი დღის შემდეგ 90%-ით იკლო, ხოლო დრონებით იერიშები ამავე პერიოდში 83%-ით შემცირდა.
მანამდე ისრაელის არმიამ განაცხადა, რომ 400-მდე რაკეტების გამშვებ დანადგარს დაარტყეს, რომელთა სამიზნეც შესაძლოა, ისრაელის ქალაქები ყოფილიყო, ხოლო გამოცემა Reuters-ს ორმა წყარომ განუცხადა, რომ საჰაერო იერიშების კამპანიის მეორე ფაზის ფარგლებში აშშ და ისრაელი მიზანში ირანის ბუნკერებს ამოიღებენ, სადაც თეირანი ბალისტიკურ რაკეტებსა და აღჭურვილობას ინახავს.
ცნობისთვის, 28 თებერვალს აშშ-მ და ისრაელმა ირანის წინააღმდეგ ერთობლივად წამოიწყეს მასშტაბური იერიშების კამპანია. პირველადი დარტყმების შედეგად ისრაელმა მოკლა ირანის უზენაესი ლიდერი, აიათოლა ალი ხამენეი და კიდევ 40-მდე სამხედრო მეთაური და მაღალჩინოსანი.
მოკლულთა შორის ასევე არიან ირანის თავდაცვის მინისტრი აზიზ ნასირზადე, ისლამური რევოლუციის გუშაგთა კორპუსის (IRGC) მეთაური მოჰამედ პაკპური, ირანის უსაფრთხოების საბჭოს მდივანი, ალი შამხანი და ქვეყნის შეიარაღებული ძალების შტაბის უფროსი, აბდოლრაჰიმ მუსავი.
1-ელ მარტს ირანული სამთავრობო მედიები წერდნენ, რომ იერიშებს ემსხვერპლნენ ხამენეის ოჯახის სხვა წევრებიც, მათ შორის, მისი ქალიშვილი, შვილიშვილი, სიძე და რძალიც. მომდევნო დღეს იერიშით მიღებულ ჭრილობებს ემსხვერპლა ხამენეის ცოლიც.
აშშ-ისრაელის იერიშებზე პასუხად ირანმა ისრაელისა და რეგიონის არაბული სახელმწიფოების წინააღმდეგ დრონებისა და ბალისტიკური რაკეტების გაშვება დაიწყო. ირანის ისლამური რევოლუციის გუშაგთა კორპუსმა ასევე განაცხადა, რომ აშშ-ისრაელის პასუხად "ისლამური რესპუბლიკის ისტორიაში ყველაზე დამანგრეველ თავდასხმით ოპერაციას" იწყებდა, თუმცა, ტრამპი უპრეცედენტო ძალის გამოყენებით დაიმუქრა იმ შემთხვევაში, თუ ირანი თავდასხმით ოპერაციას დაიწყებს.
ირანის წინააღმდეგ საბრძოლო მოქმედებების დაწყების შემდეგ ტრამპმა მედიას განუცხადა, რომ მისი გათვლებით, ირანთან ომი დაახლოებით "ოთხ კვირამდე" გაგრძელდება, თუმცა, ასევე მიანიშნა, რომ ეს დრო შესაძლოა, შემცირდეს. ხოლო თეთრ სახლში სიტყვით გამოსვლისას ტრამპმა თქვა, რომ აშშ-ს არმია მზადაა, ირანის წინააღმდეგ კამპანია უფრო დიდხანსაც გაგრძელდეს. მან ასევე IRGC-ს, ირანელ სამხედროებსა და პოლიციას იარაღის დაყრისკენაც მოუწოდა.
პარალელურად, ირანის უზენაესი ეროვნული უსაფრთხოების საბჭოს მდივანმა, ალი ლარიჯანმა X-ზე დაწერა, რომ ირანი "აშშ-სთან მოლაპარაკებას არ აპირებს."
2 მარტს აშშ-ს ცენტრალურმა სარდლობამ განაცხადა, რომ ირანთან კონფლიქტის ფარგლებში დაიღუპა ექვსი ამერიკელი სამხედრო მოსამსახურე, თუმცა, ტრამპმა განაცხადა, რომ მსხვერპლის რაოდენობა კიდევ გაიზრდება.
