პაკისტანში, ალაი ტეჰსილში დაზიანებული საბაგიროს გონდოლადან რვავე ადამიანი უსაფრთხოდ გამოიყვანეს. სამაშველო ოპერაცია 15 საათს გაგრძელდა, ამ დროის მანძილზე მგზავრები 274 მეტრის სიმაღლეზე იმყოფებოდნენ.
გონდოლაში ჩარჩენილი 6 პირი 11-დან 15 წლამდე მოზარდი იყო, მათთან ერთად ასევე მგზავრობდა ორი მასწავლებელი.
22 აგვისტოს, პაკისტანის დროით დილის 7 საათზე, ჰაიბერ პახტუნხვას ბატაგრამის რაიონში, ალაი ტეჰსილში საბაგიროს კაბელი გაწყდა. სამაშველო ოპერაციაში პაკისტანის არმიის ავიაციისა და პაკისტანის საჰაერო ძალების ვერტმფრენები მონაწილეობდა.
როგორც გონდოლაში მყოფები მედიასთან საუბარში ამბობდნენ, ერთ-ერთი მგზავრი, რომელიც საბაგიროთი ექიმთან მიდიოდა, სამაშველო ოპერაციის ბოლო რამდენიმე საათის განმავლობაში უგონოდ იყო. მათივე ცნობით, გონდილაში მყოფებს წყალი არ ჰქონდათ.
