საქართველოს პრემიერმინისტრის, ირაკლი ღარიბაშვილის თქმით, ჰაერის დაბინძურების შემცირებისა და მისი ხარისხის გაუმჯობესების მიზნით, საქართველოში 2013 წლამდე გამოშვებული მანქანების იმპორტი შეიზღუდება. პრემიერის განცხადებით, მსუბუქი ავტომობილებისთვის ეს რეგულაცია ძალაში 2024 წლის 1-ლი იანვრიდან, ხოლო სატვირთო მანქანებისა და ავტობუსებისთვის კი 2025 წლის 1-ლი იანვრიდან შევა.
"ჩვენ ვიმსჯელეთ და გადავწყვიტეთ, რომ ქვეყანაში მანქანების ევრო 5 სტანდარტი შემოვიღოთ. ეს პრაქტიკაში იმას ნიშნავს, რომ 2013 წლამდე გამოშვებული ავტომობილების იმპორტი შეიზღუდება. ჩვენი სურვილი და გადაწყვეტილებაა, რომ მსუბუქი მანქანებისთვის რეგულაცია ძალაში შევიდეს 2024 წლის 1 იანვრიდან, ავტობუსებისა და სატვირთო მანქანებისთვის კი 2025 წლის 1 იანვრიდან. ამაზე ჯერ კიდევ ვმსჯელობთ. აღნიშნული თარიღებიდან საქართველოში ვეღარ დარეგისტრირდება ევრო 5-ის სტანდარტზე ცუდი ხარისხის ავტომობილი. მიღებული გადაწყვეტილება არ შეეხება ქვეყანაში უკვე არსებულ მანქანებს. ასევე, რეექსპორტისა და ტრანზიტის მიზნებისთვის შემოსულ ავტომობილებს". - თქვა ღარიბაშვილმა მთავრობის სხდომაზე.
ასევე, ირაკლი ღარიბაშვილის განცხადებით, აიკრძალება ქვეყნიდან კატალიზატორების გატანა.
