თურქეთი

თურქეთი ქურთი მებრძოლების წინააღმდეგ სირიაში სახმელეთო ოპერაციას გეგმავს

Adem Altan/AFP/Getty Images

თურქეთის პრეზიდენტის, რეჯეფ თაიპ ერდოღანის თქმით, თურქეთი სირიაში ქურთი მებრძოლების წინააღმდეგ სახმელეთო ოპერაციებს გეგმავს. 

"უკვე რამდენიმე დღეა ტერორისტებს ვუახლოვდებით ჩვენი თვითმფრინავებითა და შეიარაღებით. ღმერთის ნებით, რაც შეიძლება მალე გავანადგურებთ ყველას, ჩვენი ტანკებითა და ჯარისკაცების მეშვეობით". – თქვა ერდოღანმა.

თურქეთის თავდაცვის სამინისტროს ცნობით, თურქეთის შეიარაღებულმა ძალებმა საჰერო იერიში მიიტანეს ჩრდილოეთ სირიასა და ჩრდილოეთ ერაყში განლაგებულ ქურთ მებრძოლთა ბაზებზე, რომლებიც, უწყების განცხადების მიხედვით, თურქეთზე თავდასხმების განსახორციელებლად გამოიყენებოდა.

იერიშების სამიზნე იყო ქურთისტანის მუშათა პარტიის (PKK) და სირიაში მოქმედისახალხო დაცვის შენაერთების (YPG) ბაზები.

ერდოღანმა ასევე თქვა, რომ სამხედრო ოპერაციები მხოლოდ საჰაერო იერიშებით არ შემოიფარგლებოდა და მასში სახმელეთო ძალებიც შესაძლოა ჩაერთონ.

ქურთების ხელმძღვანელობით სირიის დემოკრატიულმა ძალებმა 19 ნოემბერს გვიან განაცხადეს, რომ თურქეთის ავიაციამ დაბომბა ჩრდილოეთ სირიაში იძულებით გადაადგილებული ხალხით დასახლებული ორი სოფელი.

თურქეთის შინაგან საქმეთა სამინისტრო გასულ კვირას სტამბოლში მომხდარ აფეთქებაში სეპარატისტ ქურთებს, კერძოდ ქურთისტანის მუშათა პარტიასა(PKK) და სირიაში მოქმედ სახალხო დაცვის შენაერთებს (YPG) ადანაშაულებს. ეს ჯგუფები თურქეთს ტერორისტულ ორგანიზაციებად ჰყავს გამოცხადებული. თურქეთის შინაგან საქმეთა მინისტრის მტკიცებით, თავდასხმა ჩრდილოეთ სირიაში, ქურთების მიერ კონტროლირებად ტერიტორიაზე დაიგეგმა. კერძოდ, სოილუმის თქმით, აფეთქების ბრძანება ქალაქი აინ ალ-არაბიდან იყო გაცემული, სადაც PKK-სა და YPG-ს შტაბბინებია. 

აფეთქება ისთიქლალის ქუჩაზე მოხდა მაშინ, როდესაც ქალაქის ეს წერტილი ყველაზე დატვირთული იყო. თურქეთის იუსტიციის მინისტრმა, ბექირ ბოზდაღმა თქვა, რომ ამ ტერიტორიაზე შენიშნეს ქალი, რომელიც სკამზე 45 წუთის განმავლობაში იჯდა და "აფეთქება მისი წასვლიდან რამდენიმე წამში მოხდა". 

ქურთისტანის მუშათა პარტიამ (PKK) სტამბოლში მომხდარ ტერაქტში მონაწილეობასთან დაკავშირებული ბრალდებები უარყო. მათი თქმით, პარტიის სამიზნე მშვიდობიანი მოსახლეობა არ არის. 

13 ნოემბერს აფეთქებას, მინიმუმ, 6 ადამიანი ემსხვერპლა. როგორც The Guardian-ი წერს, დაიღუპა 8 ადამიანი და დაშავებულია 79.


PKK ანკარას, ვაშინგტონისა და ევროკავშირის მიერ ტერორისტულ ორგანიზაციად არის გამოცხადებული. ამ ჯგუფთან კავშირშია YPG-იც, რომელიც ტერორისტულ დაჯგუფებად თურქეთის მიერაა გამოცხადებული, თუმცა აშშ-ს მხარდაჭერილი სირიული დემოკრატიული ძალების ნაწილია. სირიის დემოკრატიული ძალები სირიაში ისლამური სახელმწიფოს ტერორისტულ ჯგუფებს ებრძოდა.

"ტერორისტული თავდასხმები ჩვენს მოქალაქეებზე ზოგიერთი ქვეყნის მიერ ტერორისტული ჯგუფების მხარდაჭერის პირდაპირი და არაპირდაპირი შედეგებია". – თქვა თურქეთის პრეზიდენტის კომუნიკაციების მეთაურმა, ფაჰრეტინ ალთუნმა.

თურქეთის პრეზიდენტმა, რეჯეფ თაიფ ერდოღანმა პირობა დადო, რომ თავდასხმაზე პასუხისმგებელი პირები დაისჯებიან.

PKK ხშირად ხდება თურქეთის ოპერაციების სამიზნე ჩრდილოეთ ერაყში, სადაც ასევე ქურთები ცხოვრობენ. ამას გარდა ანკარა შვედეთის NATO-ში შესვლას ბლოკავს ბრალდების გამო, რომ ისინი PKK-ს მფარველობენ.

 

კომენტარები