საქართველოს ყოფილი პრემიერმინისტრისა და ოლიგარქის ბიძინა ივანიშვილის Credit Suisse-ის წინააღმდეგ არსებულ საქმესთან დაკავშირებით, ივანიშვილის სპიკერმა ახალი კომენტარები გააკეთა.
"ბოლო სამი წლის განმავლობაში შვეიცარელმა მოსამართლემაც კი დაამტკიცა სასამართლოს განაჩენი, რომ Credit Suisse-ი ვალდებულია თაღლითობით მოპოვებული თანხები დაზარალებულ კლიენტს დაუბრუნოს. თუმცა, ბანკმა სასამართლო გამოიყენა, რათა სრულად გადახდა თავიდან აერიდებინა". – ამბობს ივანიშვილის სპიკერი.
ივანიშვილის სპიკერის თქმით, ბანკმა, როგორც ფინანსურმა ინსტიტუციამ, კლიენტის წინაშე საკუთარი ვალდებულებები უნდა აიღოს.
"Credit Suisse-ს სასამართლომ უნდა აიძულოს მოპარული თანხების გადახდა, მესამე პირების მიერ ანაზღაურების მიუხედავად. მისთვისაც, ვისაც ფინანსების სამართლის ელემენტარული ცოდნა გააჩნია, სავსებით ცხადია, რომ ბანკის მიერ კლიენტისთვის ვალის გადახდაზე პასუხისმგებელი Credit Suisse-ი არის. გადასახადი არ უნდა იყოს დამოკიდებული დამნაშავე თანამშრომლებზე, მათ უფროსებზე ან მართლაც მისტიკურ მესამე პირებზე, ბანმკმა, როგორც ფინანსურმა ინსტიტუციამ და კლიენტის ფინანსური უსაფრთხოების უზრუნველმყოფმა, უნდა აიღოს საკუთარი ვალდებულებები. ეს ზოგადი პრინციპი განვითარებად ქვეყნებშიც კი დაცულია და განაჩენის ფორმულირებამ, პრაქტიკულად, უკანონობა გაამართლა". – აღნიშნა ივანიშვილის წარმომადგენელმა.
ამას გარდა, როგორც ივანიშვილის სპიკერმა დაამატა, ივანიშვილმა იცის, რომ მას შეუძლია სასამართლოს თავდაპირველი გადაწყვეტილების გადახედვა მოითხოვოს, თუმცა ის მზადაა დაელოდოს, თუ რამდენ ხანს გააგრძელებს Credit Suisse-ი მსგავს ქმედებას.
"კლიენტმა იცის, რომ მას შეუძლია მოპარული თანხების კომპენსაციის მიღება სასამართლოს თავდაპირველი პოზიციის გადახედვის მოთხოვნით, თუმცა ის მზადაა დაელოდოს, თუ რამდენ ხანს გააგრძელებს ბანკი ასეთ ქმედებას". – თქვა ივანიშვილის სპიკერმა.
ბიძინა ივანიშვილი Credit Suisse-ის მიერ დანიშნულ რწმუნებულ Green Vals Trust-ს გერნისის სასამართლოში უჩივის. ივანიშვილის ადვოკატის, ვიქტორ ყიფიანის განმარტებით, ბიძინა ივანიშვილს Credit Suisse-ის რწმუნებულ კომპანიასთან პრობლემები ხელოვნების ნიმუშებისა და ვერტმფრენის გადაადგილებასთან დაკავშირებით შეექმნა. ადვოკატი ხაზს უსვამს, რომ ივანიშვილის მხრიდან საბანკო ჯგუფთან წარმოებულ დავას "ბოლო პერიოდში რამდენიმე სხვა ფაქტი მეტად საეჭვოდ დაემთხვა".
ვიქტორ ყიფიანი საზოგადოებას მოუწოდებს, რომ საქმესთან დაკავშირებით ნებისმიერი შეფასება სამართლებრივი ნორმების ფარგლებში დარჩეს. აღსანიშნავია, რომ ბიძინა ივანიშვილის მიერ დაქირავებული PR კომპანია სასამართლო დავის შესახებ გავრცელებულ განცხადებაში თავად საუბრობდა გეოპოლიტიკური მდგომარეობის გამო ივანიშვილის მიმართ დისკრიმინაციასა და პოლიტიკური ზეწოლაზე.
შვეიცარიულმა ბანკმა, Credit Suisse Group AG-მ ბიძინა ივანიშვილის წინააღმდეგ ბერმუდის სასამართლოში მრავალწლიანი დავა წააგო. ბანკს ივანიშვილისთვის $500 მილიონამდე გადახდა დაეკისრა.
ბიძინა ივანიშვილი Credit Suisse-ს უჩიოდა ბრალდებით, რომ ბანკმა ვერ შეძლო აღეკვეთა მისი პირადი ბანკირის, პატრიკ ლესკოდრონის თაღლითობა, რის შედეგადაც ივანიშვილმა ქონებიდან დაახლოებით $400 მილიონი დაკარგა, როცა ამის ცხადი ნიშნები ჩანდა. დავა ჯერ კიდევ 2011 წელს დაიწყო. ბერმუდას სასამართლოს გარდა, ივანიშვილი ბანკს უჩივის ახალ ზელანდიასა და სინგაპურშიც. ბერმუდის სასამართლოში მიმდინარე საქმე ყველაზე მნიშვნელოვანია, რადგან, როგორც ოლიგარქის ადვოკატები ამბობენ, ივანიშვილმა ინვესტირებული ქონების დაახლოებით ნახევარი სწორედ ამ ფილიალში დაკარგა. ასევე, ბერმუდის სასამართლოში მიმდინარე საქმემ შეიძლება გზა გაუხსნას სინგაპურისა და ახალი ზელანდიის სასამართლოებში განხილვაში მყოფ საქმეებს.
