აშშ-ს საკვებისა და წამლის ადმინისტრაციამ (FDA) Pfizer/BioNTech-ის COVID-19-ის საწინააღმდეგო ვაქცინას 5-დან 11 წლამდე ბავშვებში გამოყენებისთვის საგანგებო ავტორიზაცია მიანიჭა.
5-დან 11 წლამდე ბავშვებისთვის გათვლილი ვაქცინის მოცულობა ჩვეულებრივი დოზის მესამედს შეადგენს.
მარეგულირებელი ორგანოს გადაწყვეტილება FDA-ს და CDC-ის საბჭოების რეკომენდაციას მოჰყვა, რომელიც გასულ კვირას გასაჯაროვდა.
ჯერ კიდევ სექტემბერში FDA-მ გაავრცელა კვლევების შედეგი, რომელიც ადასტურებს ვაქცინის უსაფრთხოებას ამ ასაკობრივ კატეგორიაში.
ჯერჯერობით აშშ-ში 12 წლის ზემოთ მოსახლეობას ცრიან, ახალი გადაწყვეტილება კი დაახლოებით 28 მილიონ ბავშვს შეეხება. სავარაუდოდ, მათი აცრა შემდეგი თვიდან დაიწყება.
აშშ-ის ოფიციალური მონაცემების მიხედვით, პანდემიის დაწყებიდან აშშ-ში 5-11 წლამდე 160 ბავშვი გარდაიცვალა. რაც შეეხება საქართველოს, დაავადებათა კონტროლის ეროვნული ცენტრის დირექტორმა, ამირან გამყრელიძემ თქვა, რომ პანდემიის დაწყებიდან საქართველოში 9 ბავშვი და მოზარდი გარდაიცვალა COVID-19-ით.
23 აგვისტოს, აშშ-ს საკვებისა და მედიკამენტების სააგენტომ Pfizer-BioNTech-ის მიერ შემუშავებულ Covid-19-ის ვაქცინას საბოლოო, სრული ავტორიზაცია მიანიჭა.
"საზოგადოებას შეუძლია მეტად დარწმუნდეს, რომ ვაქცინა აკმაყოფილებს უსაფრთხოების, ეფექტურობისა და ხარისხის უმაღლეს სტანდარტებს, რასაც FDA მთავარ მოთხოვნად აყენებს პროდუქტის ავტორიზაციისთვის". – თქვა FDA-ის მოქმედმა კომისარმა, ჯანეტ ვუდკოკმა.
FDA-ის გადაწყვეტილების შემდეგ Pfizer-ის ვაქცინა Covid-19-ის პირველი ვაქცინაა, რომელმაც სრული ავტორიზაცია მიიღო.
