რუსეთში სასამართლომ სახელმწიფო ღალატში და ჯაშუშობაში დამნაშავედ ცნო რუსეთის მოქალაქე დენის ლობოვი და სომხეთის მოქალაქე არარატ ხაჩატრიანი. ინფორმაციას, რუსეთის ფედერალური უშიშროების სამსახურზე დაყრდნობით, გამოცემა TASS-ი ავრცელებს.
სპეცსამსახურების თანახმად, ბრალდებულები აგროვებდნენ ინფორმაციას კლისტრონებზე, რომლებიც საზენიტო-სარაკეტო სისტემის С-300 ნაწილია, გარდა ამისა, ისინი ამ დანადგარის ნიმუშებს უკრაინას გადასცემდნენ. კლისტრონი ელექტრონული მოწყობილობაა, რომელიც მაღალი სიხშირის რადიო ტალღების გაძლიერებისთვის გამოიყენება.
FSB-ს ინფორმაციით, ლობოვი აღჭურვილობას საკუთარი სახლის სარდაფში ინახავდა, ხოლო ხაჩატრიანი ნიმუშებს უკრაინაში იმ ადამიანების საშუალებით აგზავნიდა, რომლებიც რუსეთ-უკრაინის საზღვარზე ცხოვრობენ. FSB-ს თქმით, კლისტრონებს სახელმწიფო კომპანია უკრობორონპრომი იღებდა. უკრობორონპრომი თავდაცვის ინდუსტრიის საწარმოების გაერთიანებაა, რომელიც სახელმწიფოს დაქვემდებარებაშია.
დენის ლობოვს 9.5 წლით პატიმრობა მიუსაჯეს, ხოლო არარატ ხაჩატრიანს 10 წლითა და 5 თვით. სასჯელს ისინი მკაცრი რეჟიმის კოლონიაში მოიხდიან.