ჯანდაცვის მინისტრის მოადგილის, თამარ გაბუნიას, თქმით, ჩინური ვაქცინა სინოვაკით ვაქცინაცია მომდევნო კვირიდან დაიწყება. იმუნიზაციის საბჭოს სხდომის შემდეგ გაბუნიამ თქვა, რომ თარიღი დაზუსტდება, თუმცა, "რეგისტრაციის დაწყება მომავალ კვირას არ გადასცილდება".
სინოვაკს ამ ეტაპზე ჯანდაცვის მსოფლიო ორგანიზაციის ავტორიზაცია არ აქვს. კანონმდებლობით, საქართველოს აცრები მხოლოდ WHO-ს ან "რომელიმე მკაცრი მარეგულირებლის" მიერ აღიარებული ვაქცინით უნდა დაეწყო. სინოფარმის შემთხვევაში საქართველოს მთავრობა უნგრეთის მარეგულირებელს ასახელებდა. სინოვაკზე საუბრისას კი, ჯანდაცვის მინისტრის მოადგილე ამბობს, რომ კანონის ეს ჩანაწერი არ ნიშნავს ვაქცინის "გამოყენების შეუძლებლობას". თამარ გაბუნიას თქმითვე, შემუშავებულია დადგენილება, რომელიც დააზუსტებს, რა შემთხვევაში მოხდება ვაქცინის გამოყენება. მათ შორის არის WHO-ს შუალედური ანგარიში და 20 სხვადასხვა ქვეყნის აღიარება.
"ვაქცინის გამოყენების პირობა არის მარეგულირებლის მიერ დაშვება, ამ შემთხვევაში ვაქცინის დაშვება მოხდა 327-ე ბრძანების შესაბამისად, რაც გადაუდებელ ვითარებაში ვაქცინის გამოყენებას გულისხმობს.
დამატებითი პირობები იმისთვის, რომ მსგავსი გაუგებრობა არ გამოიწვიოს, რა ტიპის ვაქცინა შეიძლება გამოყენებული იყოს, ზუსტდება 322-ე დადგენილებით. წინა საბჭომ ამაზე უკვე იმსჯელა, მთავრობას წარედგინა ცვლილებები, სადაც ზუსტდება, რომ ვაქცინა, რომელიც უკვე დადებითად არის შეფასებული ჯანმოს ექსპერტების ჯგუფის მიერ და ამასთან დაკავშირებით არსებობს შუალედური დასკვნა, ეს ვაქცინა შეიძლება განვიხილოთ, ასევე ვაქცინა, რომელიც დაშვებულია 20-ზე მეტი მარეგულირებლის მიერ სხვადასხვა ქვეყანაში, და ვაქცინა, რომელიც უკვე მიღებული აქვს ჩვენს სამიზნე მოსახლეობაზე ანუ 2.5 მლნ მოზრდილი მოსახლეობა, 10-ჯერ მეტ რაოდენობას მსოფლიოში, ამ შემთხვევაშიც პროგრამა განიხილავს ვაქცინის გამოყენების აუცილებლობას და შესაძლებლობას ქვეყანაში. ამას საკანონმდებლო ცვლილება არ სჭირდება.
თუმცა, ღიად რჩება პასუხისმგებლობის გადაზღვევის საკითხი. რომელიც საკანონმდებლო დონეზე რეგულირდება, მაგრამ ამის შესახებ მოქალაქე იქნება ინფორმირებულები, ვიდრე დარეგისტრირდება და ის ინფორმაცია, რომ ვაქცინა არ არის აღიარებული ამ კონკრეტულ ეტაპზე ჯანმოს მიერ, გამოჩნდება აუცილებლად სინოვაკზე რეგისტრაციამდე პორტალზე" - ამბობს მინისტრის მოადგილე.
ჯანდაცვის მსოფლიო ორგანიზაციის სტრატეგიულმა საკონსულტაციო ექსპერტთა ჯგუფის (SAGE) გამოქვეყნებული მასალებით, ჩინური ვაქცინის, სინოვაკის ეფექტიანობა ორი დოზის მიღების შემდეგ 50.7%-ით განისაზღვრა, რაც ბრაზილიაში ჩატარებული კვლევის მე-3 ფაზით დადგინდა. ამასთან ერთად, ჰოსპიტალიზაციის შემთხვევაში სინოვაკის ეფექტიანობა 100%-მდე იზრდება, რაც ნიშნავს იმას, რომ სინოვაკი კორონავირუსით დაავადებულს იცავს გართულებებისგან. შეგახსენებთ, რომ 50%-ზე მეტი ეფექტიანობა საკმარისია იმისათვის, რომ ვაქცინამ რეკომენდაცია მიიღოს მსოფლიო ჯანდაცვის ორგანიზაციისგან.
სინოვაკის ეფექტიანობის კვლევაში სულ 12,310-მა მიიღო მონაწილეობა. კვლევა ძირითადად ჩატარებულია 18-დან 59 წლამდე ასაკობრივ კატეგორიაში - 12,098 მონაწილე და 60 წელს გადაცილებული მხოლოდ 212 მონაწილე.
ამავე დოკუმენტის მიხედვით, სინოვაკის გამოყენების შემდეგ ძირითადი გვერდითი მოვლენაა თავის ტკივილი, დაღლილობა, ნანემსარი ადგილის ტკივილი, კუნთების ტკივილი. ამასთან ერთად, ძირითადად ალერგიული რეაქციის მხოლოდ მსუბუქი ფორმები ვლინდება.
ჩინეთის კვლევებზე დაყრდნობით, სერიოზული გვერდითი მოვლენა 35.8 მილიონიდან მხოლოდ 45 ადამიანს გამოუვლინდა. ინდოეთში 17 მილიონიდან 162-ს, ხოლო ჩილეში 3.7 მილიონიდან 90-ს, აქედან ანაფილაქსიის შემთხვევა ძალიან მცირეა - 1.7/100,000.
სინოვაკის ვაქცინა გამოიყენება თურქეთში, ჩილეში, ინდონეზიაში, ბრაზილიაში. აქედან თურქეთის კვლევებში სინოვაკის ეფექტიანობა 84%-ით არის განსაზღვრული, ინდონეზიაში 65%-ით, ჩილეში - 67%-ით, ხოლო ბრაზილიის ორივე კვლევაში 50-51%-ით.
ჯანდაცვის მსოფლიო ორგანიზაციამ სინოვაკის ავტორიზაციასთან დაკავშირებით სხდომა 29 აპრილს გამართა, თუმცა საბოლოო პასუხი გადადო.
WHO-მ სინოფარმთან დაკავშირებითაც გამოაქვეყნა დოკუმენტი, რომლის მიხედვითაც სინოფარმის ეფექტიანობა 78.1%-ით განისაზღვრა, რაც მრავალ ქვეყანაში ჩატარებული მე-3 ფაზის კვლევის შედეგებით დადგინდა
სინოვაკის ვაქცინის 100 000 დოზა საქართველოში 29 აპრილს ჩამოვიდა. ეს ვაქცინები ქვეყანას ჩინეთმა აჩუქა.
