რუსული ვაქცინა

ევროკავშირის მარეგულირებელი ორგანო რუსული ვაქცინის ცდის ეთიკურ სტანდარტებს გამოიძიებს – FT

ევროკავშირის წამლის მარეგულირებელი ორგანო მომდევნო კვირას დაიწყებს გამოძიებას იმის შესახებ, თუ რამდენად მიჰყვებოდა რუსეთის კორონავირუსის საწინააღმდეგო ვაქცინის, Sputnik V-ის კლინიკური კვლევები გლობალურ კლინიკურ და სამეცნიერო მითითებებს. ამის შესახებ ინფორმაციას Financial Times ავრცელებს. 

Financial Times ციტირებს ანონიმურ წყაროებს, რომლებიც გათვითცნობიერებულები არიან ევროპის სამედიცინო სააგენტოს დამტკიცების პროცესში, სადაც გამოხატეს შეშფოთება იმის შესახებ, რომ Sputnik V-ის კვლევებმა, შესაძლოა, ეთიკის სტანდარტები არ დააკმაყოფილა. დეტალები უცნობია, თუმცა აღნიშნულია ბრალდებები, რომ ზოგი მონაწილე შეიძლება აიძულეს და ცდებში მონაწილეობა მიაღებინეს.

კომპანია Sputnik V-ის Twitter-ზე ინფორმაციას ყალბი უწოდეს. რუსეთის პირდაპირი ინვესტიციის ფონდის უფროსმა, კირილ დმიტრევმა, აღნიშნა, რომ ცდებში მონაწილე პირებზე ზეწოლა არ ყოფილა და Sputnik V ყველა კლინიკურ პრაქტიკას იცავდა.

სამედიცინო ჟურნალ The Lancet-ში გამოქვეყნებული სტატიის მიხედვით, Sputnik V კორონავირუსის წინააღმდეგ 91.6%-ით ეფექტიანია.

რუსეთი აქტიურად ლობირებს ეროვნული წარმოების ვაქცინის ევროკავშირში ავტორიზაციას. მას შემდეგ, რაც ბლოკს ვაქცინაციის პრობლემები შეექმნა, ორმა წევრმა ქვეყანამ, უნგრეთმა და სლოვაკეთმა, Sputnik V-ის მარაგები EMA-ს ნებართვის გარეშე შეიძინეს.

ვაქცინის მწარმოებელი კომპანიის ხელმძღვანელობის თქმით, ივნისის დასაწყისიდან, ევროკავშირისთვის 50 მილიონი დოზის მიწოდება იქნება შესაძლებელი. 

რუსეთის დიდსულოვან დაპირებას ევროკომისიის პრეზიდენტი, ურსულა ფონ დერ ლაიენიც გამოეხმაურა და აღნიშნა, რომ "გაუგებარია, რატომ სთავაზობს რუსეთი ევროკავშირს ვაქცინის მილიონობით დოზას, როცა საკუთარი ხალხის იმუნიზაციას საჭირო ტემპით ვერ ახორციელებს".

კომენტარები