აშშ-ში კორონავირუსის საწინააღმდეგო Pfizer-BioNTech-ის ვაქცინა გადაუდებელი გამოყენებისთვის დაამტკიცეს.
აშშ-ს საკვების და წამლის ადმინისტრაციაში (FDA) განაცხადეს, რომ ავტორიზაცია პანდემიაში "მნიშვნელოვანი ეტაპია".
FDA-ს მიაჩნია, რომ ვაქცინა უსაფრთხო და ეფექტიანია.
სააგენტოში განაცხადეს, რომ Pfizer-BioNTech-ის ვაქცინის გაკეთება 16 წლის და უფროს პირებს შეუძლიათ.
ელიან, რომ ამ თვეში თავდაპირველად ვაქცინის 2.9 მილიონ დოზას მედიცინის მუშაკებს და ასაკოვან ადამიანებს გაუკეთებენ.
აშშ-ს პრეზიდენტის, დონალდ ტრამპის განცხადებით, 24 საათზე ნაკლებ დროში აშშ-ში ვაქცინით პირველი ადამიანი აიცრება.
BioNTech-ის აღმასრულებელი დირექტორის, უგურ საჰირის თქმით, ვაქცინა "აშშ-ში ადამიანების სიცოცხლეს გადაარჩენს და შესაძლოა ნორმალური ცხოვრების დაბრუნება დაჩქარდეს".
აშშ-ს მთავრობა გეგმავს, რომ მომავალი კვირებისა და თვეების განმავლობაში ვაქცინაცია დააჩქაროს, განსაკუთრებით, თუ, მეორე Moderna-ს ვაქცინასაც მალე დაამტკიცებენ.
11 დეკემბერს აშშ-ს საკვების და წამლის ადმინისტრაციამ Pfizer-ის და BionTech-ის მიერ შემუშავებული ვაქცინის გადაუდებელი გამოყენების რეკომენდაცია გასცა.
ვაქცინის გამოცდის კვლევების თანახმად, Pfizer-ის და გერმანული ბიოტექნოლოგიების კომპანია BioNTech-ის წარმოებული კორონავირუსის ვაქცინა 95%-ით ეფექტიანია.
Pfizer-მა და BionTech-მა ვაქცინაზე მუშაობა 11 თვის წინ დაიწყეს და სიჩქარის ყველა რეკორდი მოხსნეს. ვაქცინების განვითარებას, ჩვეულებრივ, წლები სჭირდება. Pfizer-ის ვაქცინა უკვე მიიღეს ბრიტანეთის და ბაჰრეინის მოქალაქეებმა, სადაც მისი ავტორიზაცია 2 დეკემბერს მოხდა. კანადამ ის ოთხშაბათს დაამტკიცა.
მომდევნო კვირაში მოსალოდნელია, რომ Pfizer-ის ავტორიზაციას Moderna-ს ვაქცინის დამტკიცება მოჰყვეს, რომელიც მსგავს ტექნოლოგიას იყენებს და კლინიკურ კვლევებში ამის მსგავსად დამაიმედებელი შედეგები აჩვენა.
