მამის განზრახ მკვლელობისთვის ქუთაისის საქალაქო სასამართლომ პირს 15 წლით თავისუფლების აღკვეთა მიუსაჯა.
პროკურატურის ინფორმაციით, სასამართლოზე მათ მიერ წარდგენილი მტკიცებულებებით დადასტურდა, რომ 23 იანვარს ვანის მუნიციპალიტეტის სოფელ სულორში ბ.კ.-მ ურთიერთშელაპარაკების ნიადაგზე განზრახ მოკვლის მიზნით მამამისს, ა.კ.-ს, ხელებითა და ფეხებით სცემა თავისა და სხეულის სხვადასხვა ადგილში. ა.კ. თავის არეში მიღებული დაზიანებების შედეგად შემთხვევის ადგილზე გარდაიცვალა.
სამართალდამცველებმა ბ.კ. 25 იანვარს დააკავეს. მას ბრალდება სისხლის სამართლის კოდექსის 111-109-ე მუხლის მე-2 ნაწილის "ვ" ქვეპუნქტით (განზრახ მკვლელობა ოჯახის წევრის მიმართ) წარედგინა და აღკვეთის ღონისძების სახით პატიმრობა შეეფარდა.
