ჰონგ-კონგში ჩინეთის ჯარი შევიდა და როტაცია განახორციელა

29 სექტემბერს ჩინეთის სახელმწიფო მედიაში განაცხადეს, რომ ჰონგ-კონგში ჩინეთის ჩინეთის სახალხო განმათავისუფლებელი არმია შევიდა. მათ თქმით, ეს ჯარის სტანდარტული როტაციაა.

სიუჟეტიდან ვიგებთ, რომ ჰონგ-კონგში მასთან მდებარე კონტინენტური ჩინეთის ქალაქიდან შენჭენიდან ჯავშანტექნიკა, სატვირთო მანქანები და საპატრულო ნავი შევიდა. ჩინეთის სახელმწიფო მედიაში განაცხადეს, რომ ჯარისკაცებმა იცოდნენ ჰონგ-კონგის კანონები და პირობა დადეს, რომ ქვეყნის სუვერენიტეტს დაიცავდნენ. სახელმწიფო მედიაში განაცხადეს, რომ ჩინეთის სამხედრო ძალები კიდევ უფრო მეტ "ახალ" წვლილს შეიტანდნენ ჰონგ-კონგის კეთილდღეობისა და სტაბილურობისთვის. 

გასულ წელს ჩინეთმა განაცხადა, რომ ჰონგ-კონგში ჯარისკაცებისა და აღჭურვილობის რაოდენობა არ შეცვლილა. სახელმწიფო მედიაში განაცხადეს, რომ 29 აგვისტოს როტაცია ნორმალური იყო, თუმცა ჯარის რაოდენობის ცვლილების შესახებ არაფერი უთქვამთ.

ჯარი მაკაუს სპეციალურ ადმინისტრაციულ რეგიონშიც იმყოფება.

ჩინეთის ჯარის შესვლამდე ჰონგ-კონგელმა მომიტინგეებმა 31 აგვისტოს ქალაქის სრული დემოკრატიისთვის მსვლელობა დააანონსეს. პოლიციამ დაგეგმილი მსვლელობა აკრძალა.

შეგახსენებთ, რომ უკვე მე-13 კვირაა, რაც ჰონგ-კონგის ქუჩებში მილიონობით ადამიანი პრო-დემოკრატიულ აქციებზე კონტინენტურ ჩინეთში ექსტრადიციის კანონპროექტსა და პეკინის გაზრდილ გავლენას აპროტესტებს. აღნიშნული კანონი საფრთხეს შეუქმნის ქალაქის იურიდიულ დამოუკიდებლობას, თუმცა პროტესტი გაცდა ამ საკითხს და მომიტინგეებმა საბოლოოდ 5 მთავარი მოთხოვნა ჩამოაყალიბეს - კონტინენტურ ჩინეთში ექსტრადიციის კანონპროექტის სრული გაწვევა; საპროტესტო აქციების აღწერის, როგორც "არეულობის", შეწყვეტა; აქციაზე დაპატიმრებულების გათავისუფლება; პოლიციის ქმედებების დამოუკიდებელი გამოძიება და თავისუფალი არჩევნები.

ჰონგ-კონგის პოლიციამ აქციები ცრემლსადენი გაზით, რეზინის ტყვიებით, ხელკეტით, წყლის ჭავლით, წიწაკის სპრეით და სხვა საშუალებებით არაერთხელ დაარბია. აქციებზე პოლიციამ ცეცხლსასროლი იარაღიც გამოიყენა. აქციის მონაწილეებს პეკინის მომხრე მოძალადეთა ჯგუფიც არაერთხელ დაუპირისპირდა. დარბევის დროს, სულ მცირე, ერთმა ადამიანმა თვალი დაკარგა.

ოფიციალური პეკინი მხარს უჭერს კერი ლამსა და ჰონგ-კონგის პოლიციას, ჩინეთის წარმომადგენლობამ "არეულობაში" მომიტინგეთა ქმედებებს "ტერორისტული აქტები" უწოდა. არსებობს ეჭვი, რომ ჩინეთის მთავრობამ 1989 წელს თიანანმენის მსგავსად დაარბიოს აქციები. გასულ დღეებში ჰონგ-კოგთან ჩინეთის უამარავი სახმედრო ძალა შენიშნეს.

26 აგვისტოს ჩინეთის საზოგადოებრივი უსაფრთხოების მინისტრმა ჭაო ქეჭიმ ჰონგ-კონგთან, ჩინეთის გუანდუნის პროვინციაში ვიზიტის დროს, განაცხადა, რომ ქვეყნის უსაფრთხოებისა და სტაბილურობის უზრუნველსაყოფად დაარბევდა ყველა დამანგრეველ, ძალადობრივ ტერორისტულ აქტივობებს და ქვეყნის "სამხრეთის კარიბჭის" პოლიტიკურ უსაფრთხოებას დაიცავდა.

ჰონგ-კონგის საკანონმდებლო სისტემას პეკინის მომხრე უმრავლესობა აკონტროლებს. პეკინის იურიდიული სისტემა ადამიანის უფლებების დარღვევით მოქმედებს, თუმცა ჰონგ-კონგის მთავრობა მოსახლეობას ეუბნება, რომ ექსტრადიციის კანონში საშიში არაფერია. საკამათო კანონი არა მხოლოდ ჰონგ-კონგის იურიდიულ დამოუკიდებლობას, არამედ მსოფლიოს ერთერთ უდიდეს ფინანსურ ცენტრს უქმნის საფრთხეს. არაერთმა ბიზნესმენმა განაცხადა, რომ კანონი საფრთხეს შეუქმნის იმ თავისუფლებებს, რითაც ჰონგ-კონგში მყოფი ბიზნესმენები სარგებლობენ, გააქრობს ინვესტორთა ნდობას და ქალაქის კონკურენტულ უპირატესობას.

1997 წელს ბრიტანეთმა ტერიტორია ჩინეთს გადასცა "ერთი ქვეყნა, ორი სისტემის" პირობებით - ე.წ. ძირითადი კანონი, მინი კონსტიტუცია ჰონგ-კონგს განსაკუთრებულ ავტონომიას ანიჭებს, რაც კონტინენტური ჩინეთის კომუნისტური წყობისგან გამოხატვის თავისუფლებით, შეკრების თავისუფლებით, თავისუფალი მედიითა და ასევე დამოუკიდებელი სასამართლოთი განსხვავდება. ჰონგ-კონგს აქვს საკუთარი ეკონომიკური სისტემის მოდელი და საკუთარი ვალუტა. პეკინი კი მის საგარეო ურთიერთობებს, თავდაცვასა და ვიზის საკითხებს აკონტროლებს.

ძირითად კანონს ვადა 2047 წელს ეწურება. ამის შემდეგ ჰონგ-კონგის ავტონომიის ბედი, ჯერჯერობით, უცნობია.