ბრაზილია

ბოლსონაროს სპიკერი: ბრაზილია საერთაშორისო დახმარებას მიიღებს, თუ ფულს თავად განკარგავს

ჟაირ ბოლსონარო
Reuters

ბრაზილია ამაზონის ხანძართან საბრძოლველად გამოყოფილ საერთაშორისო დახმარებას მიიღებს, თუმცა მხოლოდ იმ შემთხვევაში, თუ თავად გადაწყვეტს როგორ გამოიყენოს ეს თანხა.

ამის შესახებ პრეზიდენტ ჟაირ ბოლსონაროს სპიკერმა თქვა.

"ბრაზილიის მთავრობა და პრეზიდენტი ღია არიან ორგანიზაციებისა და ქვეყნებისაგან ფინანსური დახმარების მისაღებად. ეს ფული, როდესაც ქვეყანაში შემოვა, განიკარგება ბრაზილიელი ხალხის მიერ." თქვა მან.

ბრაზილიის მთავრობა უკვე დათანხმდა დახმარების მიღებას ისრაელისაგან. დიდი შვიდეულის ქვეყნებმა კი სამიტზე შეთანხმებას მიაღწიეს და ფინანსური და ტექნიკური დახმარებისათვის 20 მილიონი აშშ დოლარი გამოყვეს. Reuters-ის ინფორმაციით ქვეყნის მთავრობამ ასევე მიიღო 10 მილიონი ფუნტი ბრიტანეთის მთავრობისაგან.

შეგახსენებთ, რომ გუშინ ჟაირ ბოლსონარომ ადგილობრივ მედიასთან საუბრისას თქვა, რომ დიდი შვიდეულის ქვეყნების მიერ გამოყოფილი დახმარება შეიძლება მიიღოს, თუ საფრანგეთის პრეზიდენტი უკან წაიღებს მისი მისამართით ნათქვამ "შეურაცხმყოფელ" განცხადებას:

"პირველ რიგში, მაკრონმა უკან უნდა წაიღოს ჩემს მიმართ შეურაცხმყოფელი სიტყვები. მან მე მატყუარა მიწოდა. როდესაც ამას გააკეთებს, შეგვიძლია ვილაპარაკოთ." თქვა მან.

გუშინ გავრცელდა ინფორმაცია იმის შესახებ, რომ ბრაზილიის მთავრობა დიდი შვიდეულის ქვეყნების მიერ ამაზონის ჯუნგლებში ხანძართან საბრძოლველად გამოყოფილ 20 მილიონ აშშ დოლარზე უარის თქმას აპირებდა. ქვეყნის თავდაცვის მინისტრი ამბობს, რომ ხანძრები კონტროლს ექვემდებარება.

ბრაზილიის პრეზიდენტის, ჟაირ ბოლსონაროს კაბინეტის უფროსმა, ონიქს ლორენცონიმ თქვა, რომ მადლობელი არიან, თუმცა ეს რესურსები ევროპის ტყეების აღდგენისათვის უნდა გამოიყენონ და რომ ბრაზილია ნებისმიერ ქვეყანას ასწავლის როგორ დაიცვას ტყეები.

"მაკრონმა ისიც ვერ შეძლო მოსალოდნელი ხანძარი აერიდებინა თავიდან ეკლესიაში, რომელიც მსოფლიო მემკვიდრეობის ნაწილია. ახლა მას სურს ჩვენ გვასწავლოს გაკვეთილები?" თქვა მან.

26 აგვისტოს პრეზიდენტი ემანუელ მაკრონი ბრაზილიის პრეზიდენტის ჟაირ ბოლსონაროს კომენტარებს გამოეხმაურა. მაკრონმა ბოლსონაროს კომენტარს მისი ცოლისათვის უაღრესად შეურაცხმყოფელი უწოდა:

"სამწუხაროა, პირველ რიგში სამწუხაროა მისთვის და ბრაზილიელებისათვის. ბრაზილიელ ქალებს ალბათ რცხვენიათ მათი პრეზიდენტის. ვინაიდანაც ბრაზილიელებისადმი ღრმა პატივისცემა მაქვს, იმედი მაქვს, რომ მათ მალე ეყოლებათ თანამდებობისათვის შესაფერისი პრეზიდენტი." თქვა მან.

ბოლსონარომ Facebook პოსტზე, რომელიც მის 37 წლის მეუღლესა და მაკრონის ცოლს, ბრიჯიტს ერთმანეთს ადარებდა კომენტარად დაწერა "ნუ აყენებთ ამ კაცს შეურაცხყოფას, ჰაჰაჰა".

გასულ კვირას ბოლსონარომ ამაზონის ჯუნგლებში ხანძართად დაკავშირებით მაკრონის კომენტარები გააკრიტიკა.

მაკრონი ამაზონის ჯუნგლებში ხანძარს გამოეხმაურა და საკუთარ ტვიტერზე დაწერა, რომ ეს საერთაშორისო კრიზისია და დიდი შვიდეულის სამიტის წევრებს მოუწოდა საკითხი განიხილონ.

"ჩვენი სახლი იწვის. პირდაპირი მნიშვნელობით. ამაზონის ჯუნგლები ჩვენი პლანეტის ფილტვებია, რომელიც ჩვენი ჟანგბადის 20%-ს გამოიმუშავებს და ახლა იწვის. ეს საერთაშორისო კრიზისია."

მაკრონის მოწოდებას ბრაზილიის პრეზიდენტი ჟაირ ბოლსონარო გამოეხმაურა. მან საფრანგეთის პრეზიდენტი სენსაციონალიზმში დაადანაშაულა და თქვა, რომ ის ხანძარს პოლიტიკური მიზნებისათვის იყენებს.

"დასანანია, რომ პრეზიდენტ მაკრონს სურს ბრაზილიის შიდა საკითხი პირადი პოლიტიკური მიზნების ინსტრუმენტად აქციოს. საფრანგეთის პრეზიდენტის შემოთავაზება, განიხილონ ამაზონის საკითხი დიდი შვიდეულის სამიტზე ამ რეგიონის ქვეყნების გარეშე კოლონიური აზროვნების გადმონაშთია ოცდამეერთე საუკუნეში." დაწერა მან ტვიტერზე.

პარალელურად ბოლსონმარომ ხანძრის ჩასაქრობად სამხედრო ძალებიც მოიშველია. ქვეყნის თავდაცვის სამინისტროს თქმით მობილიზებულია 44,000 ჯარისკაცი. ცეცხლს სამხედრო თვითმფრინავებითაც ებრძვიან.

სამხედრო ძალების ჩარევის შესახებ განცხადების გაკეთებისას ბოლსონარომ თქვა, რომ ტყის ხანძრები ყველა ქვეყანაში ხდება და ეს საერთაშორისო სანქციების საფუძველი ვერ იქნება.

კომენტარები