ქართული ოცნების დეპუტატმა დავით ჭიჭინაძემ თავისივე გუნდის წევრი გია ვოლსკი გააკრიტიკა. მისი განცხადებით, ვოლსკი ვერ გრძნობს, რა არის კორექტული და რა - არა.
"კიპლინგის მაუგლი ალბათ ყველას გაქვთ ნანახი, იქ არის მგელი და როდესაც ნანადირევს ვერ დაიჭერს, მერე კრებას ატარებენ და იძახიან, რომ აკილამ ააცილაო, ანუ აკილამ ვერ დაიჭირაო. ეტყობა გია [ვოლსკი] დაგვიბერდა და ვერანაირად ვერ გრძნობს, რა არის კორექტული და რა არაკორექტული. ქართული ოცნება ზარდიაშვილებისთვის არ შექმნილა. ამიტომ მე ვფიქრობ, ხანდახან უნდა დაფიქრდეს ჭიჭინაძესა და ზარდიაშვილს შორის შედარებას რომ აკეთებს"- აღნიშნა დავით ჭიჭინაძემ.
ჭიჭინაძის თქმით, ქართული ოცნების დიდი შეცდომაა, როდესაც ზარდიაშვილი პარლამენტის წევრია.
"ეგ [ზარდიაშვილი] არის ნეგატივის გამოსახულება. ქართული ოცნება ამ სენისგან, რასაც ჰქვია კოლექტიური ზარდიაშვილი, უნდა გათავისუფლდეს. ეს არის ყველაზე დიდი შეცდომა, რაც ქართულ ოცნებას აქვს დაშვებული, რომ ის არის ჩვენი გუნდის წევრი,"- განაცხადა ქართული ოცნების დეპუტატმა.
შეგახსენებთ, რომ სწორედ დავით ჭიჭინაძის ამ განცხადებას უწოდა საპარლამენტო უმრავლესობის ლიდერმა გია ვოლსკიმ არაკორექტული.
