მეტროსადგური "გურამიშვილი" ორი დღით დაიკეტება

უახლოეს პერიოდში, მეტროსადგური "გურამიშვილი" ორი დღით დაიკეტება. თბილისის არჩეული მერის კახა კალაძის თქმით, ეს რამდენიმე მეტროსადგურში მიმდინარე სარეაბილიტაციო სამუშაოების უმოკლეს დროში დასასრულებლად არის საჭირო. კალაძემ აღნიშნა, რომ ამის შესახებაც მოსახლეობა წინასწარ იქნება ინფორმირებული.

არჩეულმა მერმა გუნდის წევრებთან და მედიის წარმომადგენლებთან ერთად, დღეს თბილისის მეტროპოლიტენით იმგზავრა. მისი თქმით, მნიშვნელოვანია მეტროს ყველა სადგურის რეაბილიტაცია. ამასთან, კახა კალაძემ აღნიშნა, რომ მუშაობა დაიწყება ერთიანი დიზაინის მიმართულებითაც.