შპს მობიტელი, ანუ ბილაინი კავკასუს ონლაინის საცალო ქსელის შეძენას გეგმავს, თუმცა გარიგება ვერ შედგება, თუკი ბაზრის რეგულატორი საქართველოს კომუნიკაციების ეროვნული კომისია დადებით გადაწყვეტილებას არ მიიღებს. გადაწყვეტილების მიღების ვადა კი 5 აპრილს იწურება.
"კომისიამ შპს „მობიტელის" მიერ შპს „კავკასუს ონლაინის" საცალო მომსახურების სეგმენტის შეძენაზე ერთობლივი განცხადების განხილვის მიზნით საჯარო ადმინისტრაციული წარმოება 2016 წლის 5 აპრილს უნდა დაასრულოს, როდესაც საქართველოს „ზოგადი ადმინისტრაციული კოდექსის" შესაბამისად, საჯარო ადმინისტრაციული წარმოების მაქსიმალური, სამთვიანი ვადა იწურება", - წერია კომისიის განცხადებაში.
კავკასუსისა და ბილაინის მიერ გასული თვეების მანძილზე კეთდებოდა განმარტებები, რომ კომპანიები მხოლოდ ინტერნეტის საცალო ბაზრის ნაწილში ერთიანდებოდნენ, შავი ზღვის ფსკერზე არსებული ინტერნეტკაბელი კი ისევე კავკასუსის საკუთრებაში დარჩებოდა.
