პარტნიორთა კრების მიერ გათავისუფლებულმა ბაია გადაბაძემ დღეს ბრიფინგი გამართა და დოკუმენტები გაასაჯაროვა. როგორც გადაბაძემ თქვა, "ტელეკომპანია "იმედის" ფაქტობრივი მმართველი ირაკლი რუხაძე "მაესტოს" ხელში ჩასაგდებად კოტე გოგელიას ჯერ კიდევ 2015 წლის მაისში დაუკავშირდა". მისი თქმით, რუხაძეს 7 მილიონ ნახევარ დოლარად სურდა "მაესტროს" შინაარსის, მათ შორის ლიცენზიებისა და სიხშირეების მოპოვება.
"რუხაძემ კოტე გოგელიას 2015 წლის 29 მაისს მისწერა. რუხაძე სთავაზობდა მაკა ასათიანს გარიგებას და იხდიდა 7 მილიონნახევარ დოლარს. კერძოდ, მას აინტერესებდა არა კომპანიის წილები, არამედ ბრენდი "მაესტრო", ასევე ლიცენზიები და სიხშირეები. იგი ამ თანხას იხდიდა შინაარსში და არა მატერიალურ ღირებულებებში", - თქვა გადაბაძემ. როგორც ის ამბობს, ეს გარიგება არ შედგა, თუმცა, ამ ხნის განმავლობაში არაერთი შეთავაზება იყო. მაკა ასათიანმა კი, გადაბაძის განმარტებით, გარიგებაში მონაწილეობა არ მიიღო, რადგან ითვალისწინებდა პარტნიორების ინტერესებს.
"ეს გარიგება არ შედგა. თუკი მაკა ასათიანი გაასხვისებდა აქტივებს, ის "გადააგდებდა" დანარჩენ პარტნიორებს. ამ დროის განმავლობაში უცვლელად იყო შეთავაზება, თუმცა მაკა ასათიანმა რომ არ დათმო, ირაკლი რუხაძემ გამოიყენა გიორგი გაჩეჩილაძის 35%-იანი წილი", - განაცხადა ბაია გადაბაძემ.
გადაბაძის თქმით, 2016 წლის 15 იანვარს კი "მაესტროს" უკვე ყოფილმა პარტნიორებმა ლევან ჩიკვაიძემ და გიორგი ებრალიძემ წერილი გაუგზავნეს დანარჩენ პარტნიორებს, სადაც საუბარი იყო იმაზე, რომ ისინი აპირებდნენ საკუთარი წილების მესამე პირზე გაყიდვას და პარტნიორებს სთავაზობდნენ, რომ მათი წილები ორნახევარ მილიონად სამ დღეში ეყიდათ, წინააღმდეგ შემთხვევაში , ისინი აპირებდნენ გასხვისებას მესამე პირზე. რეალურად კი როგორც ბაია გადაბაძე აღნიშნავს, მათი განზრახვა იყო, რომ წილები გაჩეჩილაძეს შეესყიდა, რომლის შედეგადაც რუხაძე იქნებოდა რეალურად თანხის გადამხდელი.
გადაბაძის თქმით, სწორედ აღნიშნული ჩარევების გამო დაეკარგა მაკა ასათიანს მოტივაცია და იგი გადავიდა ნაწილობრივ დაფინანსებაზე, რის შემდეგაც გადაბაძე აღნიშნავს, რომ იძულებული იყო სასამართლოსთვის გაკოტრების შესახებ მიემართა.
ბაია გადაბაძე ამბობს, რომ შეთავაზება ებრალიძისა და ჩიკვაიძის მხრიდან გაკეთდა იმ დღეს, როდესაც "მაესტროსა" და "იმედს" შორის სარეკლამო დროზე გაფორმდა ხელშეკრულება.
