საქართველოს პრემიერმინისტრი გაეროს გენერალურ მდივანს შეხვდა

საქართველოს პრემიერმინისტრი ირაკლი ღარიბაშვილი გაეროს გენერალურ მდივანს ბან კი მუნს შეხვდა. პრემიერმინისტრის პრესსამსახურის ცნობით, შეხვედრაზე საუბარი შეეხო გაეროს როლის მნიშვნელობას რუსეთ-საქართველოს კონფლიქტის მშვიდობიანი მოგვარების საქმეში. მათ შორის, ხაზი გაესვა ჟენევის საერთაშორისო მოლაპარაკებებში გაეროს აქტიური ჩართულობის აუცილებლობას.

ქართულმა მხარემ გენერალურ მდივანს მიაწოდა დაწვრილებითი ინფორმაცია საქართველოს ოკუპირებულ რეგიონებში უსაფრთხოებისა და ადამიანის უფლებების კუთხით არსებული მძიმე მდგომარეობის შესახებ, რაც განსაკუთრებული შეშფოთების საგანია ოკუპირებულ რეგიონებში საერთაშორისო მექანიზმების არარსებობის პირობებში.

ირაკლი ღარიბაშვილის პრესსამსახურის ცნობით, ყურადღება გამახვილდა რუსეთის საოკუპაციო ძალების მიერ საოკუპაციო ხაზის გასწვრივ მავთულხლართებისა და ხელოვნური ბარიერების აღმართვის ფაქტებზე, რაც წარმოადგენს საერთაშორისო სამართლის პრინციპებისა და 2008 წლის 12 აგვისტოს ცეცხლის შეწყვეტის შეთანხმების უხეშ დარღვევას. პრემიერის განცხადებით, ეს საფრთხეს უქმნის როგორც ქვეყნის სტაბილურობას, ისე ოკუპირებულ რეგიონებში და მათ მიმდებარე ტერიტორიაზე მცხოვრებიმოსახლეობის უსაფრთხოებას.

ირაკლი ღარიბაშვილი მიუნხენის უსაფრთხოების კონფერენციაზე იმყოფება, სადაც შეხვედრებს მართავს სხვადასხვა ქვეყნის ხელმძღვანელ პირებთან და პოლიტიკოსებთან. ის უკვე შეხვდა ამერიკელ სენატორთა და კონგრესმენთა ჯგუფს, რომელსაც სენატორი ჯონ მაკკეინი ხელმძღავნელობს.