აზერბაიჯანში ვიზიტით მყოფი საქართველოს პრეზიდენტი საქართველოში ბუნებრივი აირის რუსეთიდან შესაძლო შემოტანაზე განცხადებას ავრცელებს. მიხეილ სააკაშვილის თქმით, ამ საკითხში რუსეთის სერიოზულ ალტერნატივად განხილვა საქართველოს დამოუკიდებელი კურსის ფუნდამენტური გადახედვაა. სააკაშვილი პრემიერმინისტრ ივანიშვილს ამ საკითხზე ამომწურავი განმარტების გაკეთებისკენ მოუწოდებს.
"ბაქოში ჩემი ჩამოსვლის წინ საქართველოს მთავრობის წარმომადგენლებმა გააკეთეს ძალიან უცნაური განცხადება იმის თაობაზე, რომ საქართველომ უნდა შეწყვიტოს აზერბაიჯანზე ენერგოდამოკიდებულება და, როგორც სერიოზული ალტერნატივა, განიხილოს რუსეთიდან გაზის შემოტანა. რუსეთიდან ჩვენ მცირე რაოდენობის გაზი მთელი ეს პერიოდი ისედაც შემოგვქონდა, როგორც სომხეთში ტრანზიტის საფასური, მაგრამ ენერგეტიკის თვალსაზრისით რუსეთის სერიოზულ ალტერნატივად განხილვა, საქართველოს დამოუკიდებელი კურსის ფუნდამენტური გადახედვაა", - აცხადებს სააკაშვილი.
მისივე თქმით, საქართველომ ბოლო წლებში მოახერხა ის, რაც ვერ მოახერხეს აღმოსავლეთ ევროპის ქვეყნებმა და უკრაინამ გასულ წლებში - რუსეთისგან ენერგოდამოუკიდებლობას მიაღწია.
"დღეს, როდესაც უკრაინამაც კი დაიწყო გაზის სხვა წყაროებიდან შემოტანა, როდესაც მთელი ევროპა ცდილობს, თავი დააღწიოს რუსეთზე დამოკიდებულებას, საქართველოს საწინააღმდეგო მიმართულებით მოძრაობა ნიშნავს ჩვენი ქვეყნის დაბრუნებას მძიმე წარსულში. ჯერ ერთი, აზერბაიჯანის გაზი რუსულზე რამდენჯერმე იაფია, მეორე - საქართველოს დამოუკიდებლობა და სტაბილურობა აზერბაიჯანის სტრატეგიული ინტერესია, რადგან ეს ასევე ნიშნავს აზერბაიჯანის დამოუკიდებლობასა და სტაბილურობას, ამიტომ ძალიან იაფად გვაძლევს გაზს. რუსეთის ინტერესია მეზობლებზე კონტროლის დამყარება და ამაში ენერგობერკეტის გამოყენება".
პრეზიდენტის თქმით, ალტერნატიული წყაროების მოსაპოვებლად საჭიროა თურქმენეთთან და ყაზახეთთან მუშაობა.
"რუსეთი ამ მხრივ ვერანაირად ვერ გამოდგება. ჩვენ არ გვჭირდება ისეთი წყარო, რომლის მესვეური გადაწყვეტს, როგორც ეს რამდენიმე წლის წინ მოხდა, რომ არ მოსწონს ჩვენი პოლიტიკა და ერთ ზამთრის სუსხიან ღამეს ჩაგვაბნელებს, გაგვყინავს და მიწასთან გაგვასწორებს. რა თქმა უნდა, ეს უნდა ავირიდოთ თავიდან. ამიტომ მე მოველი, რომ საქართველოს პრემიერმინისტრი ამომწურავ განმარტებას გააკეთებს", - ამბობს მიხეილ სააკაშვილი.
გაზის რუსეთიდან იმპორტის შესახებ, ენერგეტიკის მინისტრმა გაზეთ ვერსიასთან ისაუბრა. კახა კალაძემ რუსეთიდან ბუნებრივი აირის შეძენის შესაძლებლობა არ გამორიცხა. მისივე თქმით, სამომავლოდ რუსული გაზის მისაღებად მუშაობა უნდა დაიწყოს, რომ გაზმომარაგება მხოლოდ აზერბაიჯანზე არ იყოს დამოკიდებული.
"შესაძლოა ავარია ან აფეთქება მოხდეს, თან მილსადენს გარკვეული პრობლემები აქვს, რადგან აზერბაიჯანის ტერიტორიაზე აფეთქებები ხშირია და ამის გამო საქართველოში წნევა იკლებს ხოლმე. ამ მიმართულებით სამუშაო ნამდვილად გვაქვს, რომ მხოლოდ აზერბაიჯანზე არ ვიყოთ დამოკიდებულები", - ამბობს კალაძე ტელემედიის მიერ გავრცელებულ კომენტარში.
