საპარლამენტო უმრავლესობის წარმომადგენელმა, თინა ხიდაშელმა, ვენეციის კომისიის მიერ "საერთო სასამართლოების შესახებ" მიღებული დასკვნის შესახებ კომენტარი გააკეთა. მისი განცხადებით, ვენეციის კომისიამ მიიღო დასკვნა, რომელიც სიტყვასიტყვით ეთანხმება მათ მიერ შეთავაზებულ ცვლილებებს. ამასთან, მან მოუწოდა საზოგადოებას, თავად გაეცნოს დასკვნას და სიმართლეც მასში ეძებოს.
"ვენეციის კომისისამ გუშინ მიიღო დასკვნა, რომელიც სიტყვასიტყვით, ერთი-ერთზე ეთანხმება იმას, რაც კომისიას ჩვენ შევთავაზეთ, ამას ვამბობ ყოველგვარი ინტერპრეტაციის გარეშე, შემიძლია დეტალებზეც ვილაპარაკო, მაგრამ მთავარი ამბავი ის არის, რომ გუშინ ათით ნული მოვუგეთ ნაციონალურ მოძრაობას ვენეციის კომისიაში, მე მესმის მათი გაბრაზება, ტყუილის ხარისხიც იზრდება ამის კვალდაკვალ. უნდა აიღოთ დასკვნა და წაუკითხოთ ის ადამიანებს და ისინი თავად გააკეთებენ დასკვნას".
შეგახსენებთ, რომ გუშინ, 8 მარტს, ნაციონალურმა მოძრაობამ იუსტიციის სამინისტრო ვენეციის კომისიის დასკვნის პროექტის შესახებ სიცრუის გავრცელებაში დაადანაშაულა. კერძოდ, საუბარია "საერთო სასამართლოების შესახებ" კანონპროექტის იმ პუნქტზე, რომლითაც იუსტიციის საბჭოს სრული შემადგენლობის განახლებაა გათვალისწინებული.