"ისრაელი პალესტინის სტატუსთან დაკავშირებით საქართველოს გადაწყვეტილებით გაკვირვებული და იმედგაცრუებულია", - განუცხადა ჟურნალისტებს ისრაელის ელჩმა საქართველოში იუვალ ფუქსმა.
მისი თქმით, ამ საკითხზე მიმდინარეობდა მოლაპარაკება საქართველოს მთავრობასთან, თუმცა საბოლოოდ მიიღეს პალესტინის სტატუსის მხარდამჭერი გადაწყვეტილება. ელჩის თქმით, ეს არ შეცვლის ურთიერთობას საქართველოსა და ისრაელს შორის.
"მისია საკუთარი საქმიანობით ყოველთვის ცდილობდა და მომავალშიც შეეცდება ურთიერთობების გაღრმავებას ორ ქვეყანას შორის, მათ შორის პოლიტიკურ, კულტურულ თუ ბიზნესურთიერთობებში", - განაცხადა იუვალ ფუქსმა.
რაც შეეხება პალესტინის დამკვირვებელ სახელმწიფოდ ცნობის თაობაზე მიღებულ რეზოლუციას, იუვალ ფუქსი აცხადებს, რომ ეს რეზოლუცია ადგილზე სიტუაციას ვერ შეცვლის, რადგან "ასეთი მანერით სახელმწიფო არ შეიძლება შეიქმნას".
"ისრაელს სურს მშვიდობა და ეს არაერთხელ დაუმტკიცებია თუნდაც ეგვიპტის მაგალითზე. მშვიდობისთვის საჭირო არ არის ნიუ იორკში გაფრენა. ამის გაკეთება შეიძლება ადგილზეც. ამგვარი გადაწყვეტილებები ხელს არ უწყობს მშვიდობას. ვინ, თუ არა საქართველომ კარგად იცის, რა შედეგი მოაქვს დამოუკიდებლობის ცალმხრივად გამოცხადებას", - აღნიშნა იუვალ ფუქსმა.
გაეროს გენერალურმა ასამბლეამ, ხმათა უმრავლესობით მხარი დაუჭირა პალესტინის ავტონომიისთვის სტატუსის გაზრდას. პალესტინას დამკვირვებელი სახელმწიფოს სტატუსი მიენიჭა. გადაწყვეტილებას 138-მა ქვეყანამ დაუჭირა მხარი - მათ შორის საქართველომ. 41-მა თავი შეიკავა, ხოლო ცხრა ქვეყანამ - მათ შორის აშშ-მა და ისრაელმა, წინააღმდეგობა გამოხატა.
