პრემიერმინისტრ ბიძინა ივანიშვილის შეფასებით, ტელეკომპანია "მე-9 არხში" მიმდინარე რეორგანიზაცია ნორმალური პროცესია და ყველაფერი კარგად ვითარდება.
პრემიერმინისტრმა ბიძინა ივანიშვილმა ჟურნალისტებთან საუბრისას მეცხრე არხში მიმდინარე პროცესები შეაფასა და აღნიშნა, რომ ყველაფერი კარგად ვითარდება.
"როგორც ვთქვი, ტელეკომპანია დარჩება. ხდება რეორგანიზაცია, ეს კი ნორმალური პროცესია", - განაცხადა ივანიშვილმა.
როგორც ცნობილია, ტელეკომპანია მე-9 არხის გენერალურმა დირექტორმა კახა ბექაურმა გუშინ, 29 ნოემბერს თანამდებობის დატოვების შესახებ განცხადება გააკეთა, რაც არხზე მიმდინარე რეორგანიზაციით ახსნა. არხის გენერალური დირექტორის მოვალეობას ამჟამად ლუბა ელიაშვილი ასრულებს.
ამასთან, პრემიერმინისტრი ქვეყანაში მიმდინარე დაკავებებთან დაკავშირებით აშშ-ის სახელმწიფო მდივნის ჰილარი კლინტონის განცხადებას გამოეხმაურა და აღნიშნა, რომ ამ საკითხზე საქართველოს მთავრობასაც იგივე პოზიცია აქვს.
"დაკავებების პროცესის გამჭვირვალობასთან დაკავშირებით იგივეს ვფიქრობთ ჩვენც და ვაკეთებთ კიდეც. ასე რომ, ჰილარი კლინტონის განცხადებაში არაფერი განსაკუთრებული არ თქმულა", - დასძინა ივანიშვილმა.
ჰილარი კლინტონმა მაია ფანჯიკიძესთან შეხვედრისას განაცხადა, რომ სავარაუდო დამნაშავეების საქმეების გამოძიება გამჭვირვალედ უნდა მოხდეს.
