ტერორისტ ანდერს ბრეივიკს, რომელსაც 21 წლით თავისუფლების აღკვეთა მიესაჯა, ციხის ადმინისტრაციამ კვირაში ერთხელ მნახველების მიღების უფლება დართო. გადაწყვეტილების მოტივად ბრეივიკისთვის ,,ფსიქოლოგიური გადახრების აცილება'' დასახელდა, რომელიც შესაძლოა გამოიწვიოს ხანგრძლივმა იზოლაციამ.
როგორც ცნობილია, შეხვედრების დრო მკაცრად განისაზღვრება 1 საათით. ბრეივიკთან სტუმრობა შეეძლებათ მის ნათესავებსა და ჟურნალისტებს. აღნიშნული შეხვედრები ზედამხედველების მეთვალყურეობის ქვეშ ჩაივლის.
ამასთანავე, ციხის ადმინისტრაცია მზადაა ტერორისტს ნოუთბუქის გამოყენების საშუალება მისცეს, რომლის მეშვეობითაც ბრეივიკს შეეძლება წიგნებიც კი გამოსცეს, მას შემდეგ რაც მის ტექსტებს ციხის თანამშრომელი გაეცნობა.
24 აგვისტოს ოსლოს სასამართლომ ნორვეგიაში შარშან ჩადენილ ტერაქტებში ბრალდებული ანდერს ბრეივიკი შერაცხადად ცნო და მას 21–წლიანი პატიმრობა მიუსაჯა. ბრეივიკი თავს ტერორისტად არ მიიჩნევს, თუმცა მკვლელობების ფაქტს არ უარყოფს.
ანდერს ბრეივიკმა 2011 წელს ნორვეგიაში ორი ტერაქტი განახორციელა, რასაც 77 ადამიანის სიცოცხლე შეეწირა.
