საქართველოს ეროვნული ჩემპიონატის გამარჯვებულად ზესტაფონი გამოცხადდა.
ეს გადაწყვეტილება ფეხბურთის ფედერაციის აღმასრულებელმა კომიტეტმა დღეს, საგანგებო სხდომაზე, თითქმის ოთხსაათიანი თათბირის შემდეგ მიიღო.
პირველობის უკანასკნელ ტურში რუსთავის მეტალურგმა ფოთში კოლხეთს 2:0 სძლია, ზესტაფონმა კი შინ მარტვილის მერანი 3:0 დაამარცხა. მეტალურგმა და ზესტაფონმა 55-55 ქულა დააგროვეს და ჩემპიონობა ორივემ აღნიშნა, თუმცა პირველადგილოსანი მხოლოდ დღეს, სფფ-ს აღმასრულებელი კომიტეტის საგანგებო სხდომის შემდეგ გაირკვა.
”დებულებაში არსად წერია სიტყვა ფლეი-ოფი. სწორედ ამის გამო, დებულების მიხედვით ზესტაფონს უფრო მეტი მოგება ჰქონდა მთლიანად ჩემპიონატში, ვიდრე მეტალურგს და ამიტომაც, ის გამოცხადდა ჩემპიონად,” - განაცხადა სფფ-ს პრეზიდენტმა ზვიად სიჭინავამ. მისი თქმით, გადაწყვეტილება მიიღო აღმასკომმა, ის საბოლოოა და არ გასაჩივრდება.
